Hualngoram chhunga Myanmar sipai camp awm zawng zawngte chu Chin Defence Force (CDF)-in an la zo tawh, tun dinhmunah Hualngoram chhungah Myanmar sipai hmuh tur an awm tawh lo nia thu dawn a ni.
Hualngoram chu ram zalen a ni tih lantirna atan India leh Myanmar inri-na, Tiau-a ‘Welcome to Myanmar’ tih inziak chu ‘Welcome to Chinland’ tia thlak a ni a, Myanmar flag intar thin chu Chin national flag an tar tawh bawk.
Mipuiin zalenna an sual leh hnuah Hualngoram hi Chin state chhunga ram zalen hmasa ber, mipui sorkarin thuneihna an chan lehna hmasa ber nia sawi a ni.
Thudawnnain a sawi danin Hualngoram huam chhunga rorelna chu Hualngoram People Organisation (HPO)-in kut ken tawh a, venhimna lam chu Chinland Defence Force (CDF) Hualngoramin an kut ken a ni.
Tun dinhmunah Chin state huam chhung zaa 75 chu mipui sipai kutah a awm tawh a, khawpui pathum – Halkha, Falam leh Tedim-ah chiah Myanmar sipaite an awm tawh a, heng khawpui pathumte hi mipui sipaite chuan lak ngei tumin hma an la leh dawn nia thu dawn a ni.
CDF chuan Mizoram mipuite thlawpna leh tanpuina an dawnah lawm thu an sawi a, Mizoram sorkar, YMA leh tlawmngai pawl hrang hrangte bakah Mizo mipuite chungah lawmthu an sawi a ni.