Kumin January 1 atanga nimin, November 27 chhungin Mizoramah sing hnih chuang registration tihthar a awm tawh a, chung zinga za zela 72.91 chu Aizawl DTO chhunga ziah luh thar a ni.
Ministry of Road Transport & Highways website-a tar lan a nih danin kumin January-ah lirthei 2,340 registration tihthar awmin February thlaah 2,243, March thlaah 2,257, April thlaah 2,024, May thlaah 2,188, June thlaah 2,329, July thlaah 2,364, August thlaah 2,514, September thlaah 2,210, October thlaah 2,681 leh November thla kal mekah 2,428 register thar a ni tawh a, kumina registration tihthar 25,578 zinga 18,649, za zela 72.91 chu Aizawl DTO chhunga ziah luh thar a ni.
Aizawl DTO hnuaiah hian kumin chhungin thla tin lirthei 1,400 aia tlem lo lirthei ziah luh thar ziah a nia, January thlaah 1,573 ziah luh a ni a, February thlaah pung hretin 1,577 ziah luh thar a ni leh a, March thlaah chuan 1,644-ah a kai chho a, April thlaah tlahniamin, 1,452 ziah luh thar a ni.
Kumin thla 11 chhunga lirthei ziah luh thar tlem ber thla a ni a, May thlaah 1,597, June thlaah 1,733, July thlaah 1,719, August thlaah 1,973, September thlaah 1,615 ziah luh a ni a, kumina lirthei registration tihthar tam ber thla October-ah 1,984 ziah luh niin, thla kal mek November-ah ni 27 thlengin lirthei registration tihthar 1,782 a awm tawh a ni.
VAHAN dashboard-a tar lan a nih danin kumina lirthei registration tihthar zingah lirthei ke hnih nei a tam ber a, registration tihthar 18,523 a awm a, hei hi registration tihthar zawng zawng atanga chhutin za zela 72.41 a tling a, a dawtah chuan car a ni a, car thar ziah luh thar hi 4,286 a awm a ni.