Minister atana lakluh thar K. Sapdanga, Lalnghinglova Hmar leh Dr. Vanlalthlana te’n nimina lak luh an nih zawh khan Aizawl Press Club tlawhin, Mizoram Journalists’ Association (MJA) member-te nen an inkawm.
An inkawmnaah MJA president lo ni tawh, tun sorkara home minister ni ta, K. Sapdanga chuan thu sawiin media chu minister a nihna kawng sialtu leh hlang kaitu a nih thu a sawi a. He mawhphurhna a namluttu media a nih angin MJA member-te chu amah tawiawma thlawp tur leh finchhuah turin a sawm.
K Sapdanga chuan ramria sumdawng driver-te laka receipt awm lo tur chhiah lak vak vak hi ram hmel tibaltu nia a hriat thu leh, tihtawp tul a tih thu a sawi bawk.
Sports Youth Service Minister Lalnghinglova Hmar pawhin MJA-te chu a tihdik lo hrilh hreh lova a tul ang thurawn pe tur leh finchhuah turin a sawm.
DIPR Minister Dr. Vanlalthlana pawhin chanchinbu khawvelah a mikhual loh thu leh a theih leh phak ang tawka media lama a lo inhman ve tawh thin thu sawiin, MJA member-te nen tha taka an thawhho a beisei thu a sawi.
Minister tharten lakluh an nih hnu an chenna pan hmaa Aizawl Press Club an tlawh hmasa ber chu MJA chuan lawmawm an tih thu an sawi.
An inkawmnah hi MJA Gen. Hqrs. President C. Lalrambuatsaiha’n a kaihruai a ni.
Minister-te hi an nupui theuhten tawiawmin, DIPR Director C. Lalnunkima leh Dy. Director Mina Zoliani bakah Serchhip leh Champhai MJA member-te an tel bawk.