Chief Minister Lalduhoma chuan thlai thar sawhthing, aieng, hmarcha leh hmunphiah lei chu sorkarin hna hmasaah a nei dawn tih a sawi a, inrenchemna an kalpui dawna minister-ten hma an hruai dawn tih a sawi.
Nimina sorkar thar lak luh a nih hnua chanchinbu mite a kawmnaah Duhoma chuan ni 100 chhunga an ngaih pawimawh turte a puang a, mipui hnena an lo intiam tawh angin sawhthing, aieng, hmarcha leh hmunphiah te chu minimum rate tharin an lei dawn tih a sawi a, state marketing board din vat an tum a, thlai thar leiin, supply chain kalpui a ni ang a, thlai thar sawngbawlna te pawh buaipui a ni dawn tih sawiin an ngaihpawimawh ber chu kuthnathawktute an nih thu a sawi.
Duhoma chuan fincance department-in SEDP hnuaiah Rs. vaibelchhe 150 a dah that chu thu leh awm hma chu khawih chet tawh loh tur a nih thu sawiin, Mizoram budget thar chu a danglam dawn a, chhiarkawp pawh a dik dawn a, ZPM policy mil budget a ni dawn tihte a sawi a, minister hnathawh dan tur road map duan sa an nei a, chumi hmang chuan hna an thawk dawn tih leh chumi ang zul zuia budget siam turin department te an chah tih a sawi.
Sorkar sum mahni mi mal account-a lo la dah an lo awm palh a nih chuan action lak ngai loa mahni lo inching fel turin hriattir an nih thu a sawi a, resource mobilization committee din an tum a, a rang thei ang bera hnathawhtir an tum thu te, inrenchemna an kalpui dawn a, minister-ten hma an hruai dawn tih a sawi a, MLA-ten 4th Grade an neih theih chin tihtlem a ni dawn a, chief minister-in awmpui pariat an neih theih chin chu paliah tihhniam a ni dawn a, minister-ten awmpui pali an neih chu pahniah titlemin, MLA-in pahnih an neih thin chu pakhata tihtlem a nih tur thu a sawi.
Chief minister chuan minister-te lirthei kawl theih zat pawh tihtlem a nih tur thu sawi bawkin, “Minster pakhat zelin car pakhat leh spare pakhat kawl ang,” a ti a. Minister-te bangla furnishing chu la tha tawka ngaih a ni a, a awm sa chu rin mai tur a nih thu a sawi a, minister-te zin an inzui duah duah thin chu tihtawp a nih tur thu te, an lirthei sikul naupang hmuah nana hman te chu phal a nih loh thu a sawi a, thil tenauah khuallianah tan fo an tum lo tih a sawi bakah, “In zawn hi khap a ni,” a ti.
Sorkar liam taa work order pek chhuah tawh, hna lo tan tawh zawng zawngte chu cancel a ni dawn lo a, tha takin thawk turin an duh a, hna chhia erawh bill an pe dawn lo tih a sawi a, eirukna do kawnga hma an la nasa dawn a, CBI hnenah general concen a rang thei ang berin an pe dawn tih te, Mizorama project zawng zawngte en dik turin monitoring committee an din dawn tih te, hun vawn dik turin hma an la dawn tih te, Mizoram Subordinate Services Selection Board, SEDP Board leh Resource Mobilization Department chu thiah nghal a ni dawn tih bakah Mizoram run mektu ruihhlo chu tih tak zetin an do dawn tih a sawi.
Sorkar tharah mi tinin dik takin thil an ti tur a nih thu sawiin, diknaa ro rel a intan tawh hnua thil tisualte chungah an khauh dawn a, mahni hming pawh tilang ngam loa fake account hmanga dawt hmanga mi dang bei thinte chu an chhui chhuak zel dawn tih te, politics transfer chu tih ve loh hram an tum dawn tihte a sawi a, sorkar hnathawkte zalenna chu rah beh a ni ve dawn lo tih a sawi bakah minister tin office-ah complaint box leh suggetion box hun a ni ang, rawtna leh sawisel duh neihte tan a theh luh theih reng dawn tih a sawi bawk a ni.