Aizawl: Mizo Zirlai Pawl (MZP) General Headquarters buatsaih, Aizawl Smart City Ltd MZP Inter High School Quiz 2023 chu Zirtawpni zan khan Ignite Studio-ah zawh fel a ni. He hun hi Hrangturzo bialtu MLA Lalmuanpuia Punte chuan khuallian niin a hmanpui.
Quiz kharna inkhawma khuallian Lalmuanpuia Punte, MLA, chuan thalaite chu IAS ah an tling kher lo a nih pawhin, central service tam takah inziah luh an inzirtir a tul tih a sawi.
Lalmuanpuia Punte chuan MZP din thar leh atang khan Mizo hnam inpumkhatna an buaipui char char tih sawiin, “Duhlian tawng hmang lo pawh hi Mizo vek kan ni, duhlian tawng chauh hi Mizo tawng a ni lo va. Tumah hi inenhrang thei kan ni lo,” a ti.
MZP president hlui ni bawk, Lalmuanpuia Punte chuan Mizo history-ah pi leh pute hi inngeih lo viau anga sawi chu pawi a tih thu a sawi a. Hmun hrang hranga awmte an inhriatpawh danah an inngeih viau tih a hriat thu sawiin, “Mizo hnam hi a ding chhuak dawn. Hnam dang awpna hnuaiah hian kan awm rei lo vang,” a ti bawk.
MZP-in Inter High School Quiz 2023 a buatsaihah hian zirna in 13-a zirlaite an inel a. St Paul’s Higher Secondary School chuan lawmman pakhatna lain pawisa fai Rs 30,000 bakah thuziak leh trophy an dawng a. Pahnihna St Joseph Higher Secondary School-in pawisa fai Rs. 20,000 bakah trophy leh thuziak an dawng a, pathumna CLS Academy-in pawisa fai Rs. 10,000 bakah trophy leh thuziak an dawng bawk.