Thlasik vanglai a ni a, Europe khawmualpuiah pawh an buai phah hle. A bikin Germany leh Sweden ram hmun tam takah vur tla nasa lutukin kawng a hnawh a, lirthei kal vel a buai a, rel zin tur a buai a, sikul pawh an khar phah nual.
Red Cross chuan German chhim lam, Bavaria state-a sikul kai tur phurtu lirtheite chu puiin rel kal vel pawh a buai phah hle a. Ningani khan mipa naupang kum 9-a upa chu thing tluin a delh hlum bawk.
Sweden hmar lam pawh vur tla nasa hian a tibuai hle a, kawngpui zawng zawng deuhthaw a hnawh ping a. Austrian chhanchhuaktu (rescuer)-te chuan kawngpui hnawh nasa lutuk hi an thian a, snowboard hmangin an kal thei hram.
Austria-ah hian nimin khan a hma nia nasa taka vur tla tlingkhawm chu hmun thenkhatah chuan metre 3 laia chhahte a ni a. Kar hmasa lamah khan mi 7 an thih phah tawh a, mi 2 chu an chin hriat lohvin an la awm mek bawk.
Austria-a Central Institution for Meteorology & Geodynamics-a mi, Alexander Radlherr chuan hetianga vur tla nasa hi a thleng zen zen lo niin a sawi a, “Metre 800 leka sanga vur heti zat tla ang hi chu ku30 leh 100 dan velah chauh a thleng thin,” a ti.
Sweden-ah hian hurricane thawkin hmar lamah vur hi a surtir niin an sawi a. Storm Jan an tih hian Norway nena an inrina lai, Stekenjokk vel a nuai a, hmun thenkhatah chuan second 1-a metre 49.7 (111mph)-a chakin a tleh a ni.
Germany-a Bavaria-ah pawh vur tla hi an buaipui hle a, nunphung pangngai a tikhaihlak nasa hle niin tualchhung chanchinbute chuan an ziak a. Polish mi, kum 41-a upa chu chawlh a hmanna hmun, Schlossalmbahn atanga a chhuak chu a chin an la hre thei lo tih an sawi.
Bavaria-ah hian an state chhim leh hmar lamah kawngpuiah vur a tam bakah thing tlu a tam avangin lirthei leh rel a che mumal thei lo hle a. Mipa naupang hi Munich bula vurin a bawh khah zo lova thing tluin a delh hlum a ni.