Trinamool Congress hruaitu, Mahua Moitra chuan kar hmasaa thamna laa zawhna zawta puh a nih avanga Lok Sabha member a nihna hlihsak a nihna chu Thawhtanni khan Supreme Court-ah khinna thu a thehlut.
Kum 49 mi, Moitra-i hi thamna a la a, heng zingah hian Darshan Hiranandani-a hnen atanga Rs. Vaibelchhe 2 leh thil hlu a lak pawh a tel a. Heng thil hi parliament-ah sorkar hnena zawhna zawt tura an tih nana ti an nia puh a ni a. Hei bakah hian parliament website-a member-ten an inziah luh theihna (log-in credential) pawh mi dang hnenah a pe chhawng a, hei hi Hiranandani-a’n amah ngeiin zawhna a zawh theih nan a ti nia puh a ni bawk.
Modi-a sorkar sawisel nasa tak thin, Moitra-i hian thamna a la nia puhna chu a pha a, log-in detail mi dang a pe tih erawh a pha lo va; mahse, hetianga mi dang pek hi MP dangte pawhin an chin than vek a nih thu a sawi thung.
Moitra-i’n chungthu hi Ethics Committee chuan ngaihtuahin report an siamah ‘dan lovin thil a dawng ngei a, hei hi chu phat rual a ni lo’ tia ziakin, ‘sumdawng hnenah log-in detail pechhawngin thil pek a dawng ve thung’ niin an ziak bawk.
Report-ah hian ‘…MP tan tih chi a ni lo va, tih âwm lo tak a ni’ tiin an ziak bawk.
Phek 500 vela chhah report hi Lok Sabha-a pharh a nih hnuah eptu leh rorel lai, BJP inkarah inhnialna nasa tak chhuah phahin Moitra-i chu a tawng chhuah phalsak tura nawrna pawh a na hle.
Sawihova voice vote lak a nih hnuah Lok Sabha Speaker Om Birla chuan, “He rorelna in committee thutluna hi a pawm a, MP Mahua Moitra-i chet dan hi tih dan lo tur tak a ni a, MP a nih zel hi a rem tawh lo…,” tiin a sawi zui a ni.
Lok Sabha-a thu a sawi ve an phal loh chungchangah Moitra-i chuan parliament pawnah ethics panel chu a sawisel nasa hle a, ‘dan engkim an bawhchhia’ nia sawiin an chet dan chuan CBI-in an dap a hnaih tih a lantir niin a sawi bawk.
CBI hian Moitra-i an puhna hi a chhui tan mek reng a ni.
Trinamool boss, Bengal Chief Minister Mamata Banerjee chuan MP atanga Moitra-i paih a ni chu ‘pawmawm loh’ a tih thu a sawi a, ‘BJP-in phuba lakna politics an khel hian mipui rorelna a tithi mek zel a ni’ a ti bawk.
A hmain Mamata hian BJP-in anmahni huai taka sawiseltu, Moitra-i paih tumin hma an la niin a lo sawi tawh a, “… mahse, he thil hian inthlanah a pui zawk ang,” a ti.