Ningani zana Spanish La Liga inkhel awmchhunah Real Madrid chuan mikhual an nihna hmunah si hnih faiin hnehna an chang a, Girona lehpelin table chungberah an kir.
Estadio Coliseum a lenglut Real Madrid hi an tualchhunga an elpui lian Getafe lakah an khel tha viau a, table chung bera kir ngei tuma thapui tawh an ni bawk a goal pawh an thun har lo. Inkhel tan tirteah Real hia hun tha an nei nghal a, Vinicius pet tha tak chu Getafe goalkeeper David Soria-a’n a dansak. An hun tha neih hmasak hloh bawk mah se goal thun turin an nghak rei chuang lo. Ding lam sir atanga Lucas Vasquez ball ball vawrh luh tha tak chu Joselu Mato chuan hnaite atangin a tauh goal a, minute 14-naah hmahruaina goal a thun.
Hma taka goal an thun vangin inrintawkna sang zawk nen an inlan chhunzawm a, an khel tha zui hle. Joselu chuan goal thun belh theihna hun remchang nei mah se singhak Soria a paltlang thei lova, chawlhlawk hmain goal a thun belh thei lo va, si khat faia hmahruai chungin chawlhlawk an hmang.
Second half tan tirhteah Real Madrid defender Antonio Rudiger chu hliam vangin lakchhuah a ni a, Camavinga luhtir a ni. An defender pawimawh tel lovin Los Blancos an buai lo.Minute 61-naah goal hmahruai thuntu Joselu chuan an goal hnihna a thun zui leh. Getafe tan hian Mason Greenwood leh Borja Mayoral ten goal post tihper bawk mah se goal an thun thei lova, an mualah si hnih faiin a tlawm zui phah.
Getafe laka hnehna chang Real Madrid hian Girona chu point hnuin an lehpel a, table chung ber an luah let leh. Hetih lai hian Getafe hi 10-naah an awm mek thung.