- A Lutuka Thil Tih
I bialnu/bialpa nen in in date a, khawimaw lai fianrial deuhvah thupui fun takin in titi dawn a. I phûrsona leh châkna te kha control hlei thei lovin awm suh. A châng chuan i zam lutuk a, awmze nei mang lovin i ne ne kual vel mai mai thei bawk.
I zamchhiatna leh phursona aṭanga i thil suangtuah vel kha in nakin hun hlimna atana awmze nei mang lo te a ni duh viau dawn a nia. In titinaah khan in goal thlen vat kha nghahhlelhawm hle bawk mah se, nakina in hlimna tur zawk ngaihtuahin rang lutuka thutlukna siam tura innawr chûng chûng te hi a ṭha ber lo.
Hei hi mi tamtak tihsual ṭhin, an ngaihzawngten an ṭhen chhan pakhat a ni.
I partner kha i hre chiang em? A ni pawhin a hre chiang chein kawppui atan a duh tak tak che em? Hriat chian tum la, a duh tak tak hrih lo che nia i hriat phei chuan ṭan la zual hrih sauh zawk rawh.
Incheina tur i lei dawn te khan i en uluk ṭhin hle a ni lawm ni. I dam chhunga i kawp-pui tur phei chu i uluk a ngai hle a, hun sen tam deuh huam rawh.
- Mi Famkim An Awm Lo
Hei hi bantlang te ban tlang chhan a ni leh bawk.
An duh fir lutuk a. An duhthusam lah khawvelah an awm si lo. Neih tur an hmu thlawt lo a ni ber.
Media lam i thlir chuan (thlalak ringawtah) hmel ṭha tak tak, ngo tak tak, it-awm tak tak hlir i hmu ang a, a takah erawh i rin aiin an tling lo vek ang.
Nang pawh, i in beisei aiin miin an hmu sâng lua lo mai thei bawk che.
Pawn lam chu dah ṭha ila, chhunglamah pawh i kawppui nen intih thiamlohna, inremlohna eng eng emaw in nei zel ang. Mahni lam insiam ṭhat tum dêr si lova, kawppuite hlir hmuh tlinlohna hian a tawpah inṭhenna a thlen leh mai duh hle.
- Ṭhian ṭha, thurawn ṭha petu tur che i mamawh.
Mi tamtak atna leh mawlna chhan chu an pianzia renga mawl leh â ni lovin (tumah fing sa kan awm lo zawk) thurawn pek an theih loh vang emaw thurawn ṭha petu an neih loh vang emaw te a ni ṭhin.
- Insit Lutuk Suh
Hlim hmel tluka hmuh nuam a awm lo
I ‘seih’ (smiling) kha i nitin nun dan ni tawp mai teh se. Mahse, eng nge i hlim loh chhan kha? I kawppui kha i hmangaih avangin tling hliah hliahin i hmu a, chu chuan tling lo riauva inhriatna a neih-tir vethung che.
“Kei hi chu mahni maia khawsa tur ka nih dawn hi!”
“Hmangaihna hi chu maw, ka chan tur a awm ve lo a ni ang,”
Heti ang lam chi ngaihtuahna hian i ‘seih’ kha a tibo vek thei a. Mahni chungchang ṭha lo tak leh dik lo taka inhmuhna chuan i thlarau thlengin a nghawng pawi thei a. Hmangaih-na thu-ah anchhia i inlawh chawp vel mai mai thei.
- Chu ai chuan………
Midang ang bawk, mi pang-ngai ve bawk i ni tih kha theihnghilh ngai suh. Tuna mi’n a hnawl che pawhin tu emaw chuan a hmangaih ngei ngei ang che, tih kha ring ringawt lovin hre chiang hle ringawt mai rawh.
- Ti Hûam Ṭhin Suh
Kawppuite chân hlauh luata tih huam zel, an thu sawi apiang i he lova pawm thluam zel, hnial duh miah lo (phal lo ti zawk ang) te hian an kawppuite tan “mi phut khatah” an insiam hlauh zawk ṭhin a. An duh luat-ah at an hlawh nulh zel.
I kawppui diklohna chu ṭha takin, dam takin hrilh zawk la, a chapo hle chuan bansan hmak ngam rawh. Mi pakhat, mi pangngai tak i ni a, a ni lo kha khawvelah duh hliah hliah-tu che an awm ṭeuh tho vang. “Aih” tih a ṭul chuan tihreh reng reng suh. Hetia kan tih hian chapo larh rawh, tih lam a ni lo. Chapona chu thil dang daih a ni.
Chutia thil nih dan tur taka i tih chuan i kawppui chuan a ngaisang zawk ang che. Mihring inhmangaihnaah hi chuan ‘in ngaihsanna’ hi a tel tlat a nia!