Taiwan thliarkar khawchhak lam vaukam chu lirnghing magnitude 7.4-a nain a sawi hnuah chhanchhuah hna thawh mek a ni a, hriat theih chinah mi pakua vel thi awmin mi 800 chuangin hliam an tuar.
Leiverh chimah mi 127 vel tang an awm a, vaukam hrul tlangdunga kawngpuite chu lei minin a hnawh nasa hle.
Lirnghing intanna hi Hualien chhim lam km 18 vela hlaah niin an khawpui, km 100 chuanga hla, Taipei pawh a sawi phak thung.
Tun tum lirnghing hi kum 25 hnua Taiwan-a thawk na leh ber a ni.
Nilainia lirnghing avang hian a bul hnai Japanese leh Philippine thliarkarahte chuan tsunami thawk thei avanga inralrinna dar khawn a ni a; mahse, a hnuah hlih leh a ni a. Hualien hian a tuar nasa hle a, in a tlu a, kawngpui a ping a, rel tlan pawh a buai phah a; hmun kilkhawr deuhte chu tlawhpawh theih loh an ni mek hlawm.
“Zing ka tho chiah a, thawmhnaw bawm leh chhiar hniam deuhte chu a tlu rem rum a ni,” tiin Hualien-a cheng, Ocean Tsai chuan BBC Chinese a hrilh a. “A na hle a,m kan thil neihte a chhiat ka hlau nghal a; mahse, vanneithlak takin kan motorcycle a tlu tih loh chu chhiatna lian kan tawk ta lo hlauh,” a ti.
Tuipui kam hrulah erawh chhiatna a nasa hle a, social media-ah pawh video nasa taka thehdarh a ni a. Tlangte pawh a mual chima chimin tuipuiah an tla lut a, a khu leh tui fawn a nasa hle.
Tuipui kam hrulah hian kawngpui zim tak a kal a, leiverh a awm nual bawk a, hei hi chimin mi tam tak an tang a. He kawngpui hi khualzinten an zawh nasa a, tlangram hmun thengthaw tak atanga Pacific Ocean thlir theihna remchang a nih nghal avangin zawhtu an tam thin a. A chhengchhe hle thung a, lei min pawhin a lo hnawh fo tawh thin a ni.
Chhanchhuah hna thawktute chuan Hualien kawngpuia Jinwen leh Qingshui leiverha tang mi 77 chu an pawh tawh a, zanah pawh an thawh chhunzawm zel a. Thlalakah chuan Qingshui leiverh bula kawngpui chu a bal tih hmuh theih a ni bawk.
A chhunga tangte hi engtia rei nge an tan dawn hriat theih a la ni lo va, ei tur leh in tur an nei em hriat a la ni lo va, biakpawh theih an ni dawn em tih pawh hriat a la ni lo bawk.
Hmar lam deuh, Taipei pawh a sawi na viau a, chenna in a chim a, sikul leh ina mi eng emaw zat hmun himah thiar chhuah an ni a. Tual chhung TV station-te chuan lirthei leh dawr chhe neih nuaih thlalakte pawh an tichhuak a. Thliarkar pumah power leh internet a awm mumal rih lo bawk.
“Lirnghing hi khawmual bul lawkah a ni a. Taiwan pum pui leh a chhehvela thliarkarte a sawi a… Kum 25 chhunga a na ber a ni,” tiin Taipei-a Seismology Centre Director Wu Chien Fu chuan a sawi.
Mihring maktaduai 23 chenna, Taiwan hi a khawchhak lam, Hualien awmna vel hi a tam zawk tlangram a ni a. Mihring an chen tam vak lohna lai a ni a, ram leilung fa chenna hmun a ni a. An hun hmasa lamah phei chuan a tlang a san hlawm em avangin Taiwan hmun dang atanga tlawhpawh an ni ngai lo.
Kum 1930 chho vel atang khan sorkarin lung lian tak takte chhu chhiain lei a verh a, kawng a sial ta a, hmun dang pawh an tlawhpawh thei ta a. Kawng awm tawh mah se tun thleng pawhin kal a la harsa tho va, chhanchhuah hna thawh pawh chak a harsa deuh.
Kawr ruam thuk tak tak a awm a, Hualien daiha awm, Taroko National Park chu miin an tlawh nasa a. Thi zinga mi pathum pawh hi kea hawi thawveng (hiker) an ni a, tang mi 50-te pawh thawktu, chawlhkar tawp hmang tura khualbuk lar taka inkulhte an ni.
Nilainia lirnghing hi an ram huna zing dar 7:58 (India-a zing dar 5:28)-ah lei hnuai km 15.5 atanga intan a ni a, a hnuah nghing nawn vawi kua vel, magnitude 4 leh a chung lama na a thawk leh tawh bawk.
“Sorkar chuan thil thleng nihna dik tak hriat leh a tul anga a mamawhtute hnena an mamawh pek a tum a, mipuite hi him leh dam taka an awm a duh ber a ni,” tiin President Tsai Ing-wen chuan a sawi.
Taiwan foreign office pawhin X-ah thuchhuah siamin ‘kan thawhpui leh thian’ Japan leh Paraguay atanga puihna leh tawrhpuina an dawn avangin lawm thu an sawi.
Taiwan-a agency, China nena an inpawhna, Mainland Affairs Council pawhin China-in a ngaihven thuai avangin lawm thu an sawi a, hetih rual hian puihna erawh an la dil lo va. Beijing hian mahnia rorelna hran nei thliarkar hi a ram bung khatah a chhal a ni.
Taiwan hian lirnghing a lo tuar fo tawh thin a; mahse, tual chhung mi leh khualzin, Taipei-a awm mekte chuan tun tum anga na hi an la tawng ngai lo tih an sawi deuh vek hlawm.
Lirnghing na an tawrh hnuhnung ber chu September, 1999-a magnitude 7.6-a na kha niin mi 2,400 vel an thi a, chenna in 5,000 vel a chhia a ni.