EPL 2023-24 khar a ni dawn

Khawvela tualchhung League ropui ber English Premier League (EPL) 2023-24 season chu Pathianni zan hian khar a ni dawn. Pathianni zan dar 8:30 hian EPL team 20 te a rualin an inlan vek dawn a, tihchiang ngai zawng zawng tihchianin a awm tawh ang. Football ngainatute hriat chak ber chu City nge champion ang Arsenal zawk tih a ni a, Manchester United dinhmun tur hriat a chakawm viau bawk.

EPL 2023-24 khar a nih dawn thlengin champion an la awm lova, Manchester City leh Arsenal te champion thei dinhmunah an la ding. Champion lai Manchester City in champion theihna hun tha tak an nei a, an hnuai chiaha awm Arsenal aiin point hnihin an sang zawk mek. City hian an mualah West Ham United an hneh a nih chuan EPL-ah a zawnin vawi li an champion dawn. EPL-ah hian a zawna vawi li champion zawn thei an la awm ngai lo va, City hian record thar siam theihna hun tha tak an nei. Pep Guardiola team te hian an mikhual West Ham an hneh a nih chuan tuma dan rual lohin an champion ngei dawn.

City hi an mikhual West Ham lakah chak zo ta lo pawh ni se Arsenal in an mikhual Everton an hneh lo ve bawk a nih chuan City hi an la champion thei dawn tho a. Arsenal in an mikhual Everton an hneh a nih erawh chuan City tan chak ngei ngei a ngai dawn. West Ham nen an inhnehtawk a, Arsenal in Everton an hneh bawk si chuan Arsenal hian goal difference-ah goal khata an that zawkna an chhawr tangkai ang a, an champion daih thei dawn.
An champion theih dan leh an champion loh hlauh theih dante sawi kual chiam thin mah ila City hi champion turin an dinhmun a tha veng vawng hle. West Ham tan Etihad Stadium-ah ngei City hneh tur chuan thil mak an thlentir a ngai dawn. City laka thil mak thlentir turin Hammers hi an pualawm loh hle. EPL mai ni lo, khawvel puma team tha ber ang hiala ngaih theih an nih miau vang leh champion leh champion loh hril thei a nih vangin City hi chak lo ngawt tur chuan rin an hnar hle. Inrinsiak hun lai hi a nuam a, a hlimawm tel ve bawk. Kan inrinsiak viau chungin EPL champion tur chu City tho tho an nih hmel.

Thilmak thleng ve thut thei a nih vangin EPL-ah champion tur a la chiang lo va, top 5 erawh a chiang kim tawh thung. City emaw, Arsenal emaw zawk zawk an champion ang a, pathumnaah Liverpool awm in, Palinaah Aston Villa an awm a. London club lian Tottenham pawh pangana an ni chiang ve tawh bawk.

Paruknaah Chelsea an awm mek a, Blues hian Europa League khel phak turin point khat an la mamawh. Chelsea hnuai chiaha awm Newcastle United an chak a, Chelsea an tlawm a nih bawk si chuan Newcastle United hian goal difference hmangin an lehpel thei dawn. Season tawp dawn hnaihah chak thiam thar Chelsea hian AFC Bournemouth an mikhual dawn a, an mualah point an hmuh ngei a rinawm.

Chelsea an lehpel phak lo a nih pawhin Newcastle United hian Europa Conference League khelh phak theihna hun tha an la nei. Europa Conference League khelh hi Manchester United nen an inchuh na viau dawn thung. Newcastle leh United te hian khelh 37 atangin point 57 an hmu ve ve mek a. An khelh hnuhnung berah an chak ve ve an nih chuan pariatnaah Newcastle an awm ang a, pakuana ni chungin United in season an khar ang. Europa Confference League em pawh an khel phak lo a nih chuan team ropui United tan mualphona vawrtawp a ni thei hial ang.

EPL-ah pakuana ni chungin season hmang zo mah se Manchester United hian FA Cup final an la khel dawn a, Europa League final khelh theihna hun remchang an la nei. FA Cup final-ah an khingpui Manchester City an hneh a nih chuan Europa League an khel ang a, table-ah paruknaa awmin Europa Conference League an khel zui ve thung ang.

Table chung lamah an inthlir fel deuh duak tawh laiin table hnuai lawm pawh an thliar fel thawhkhat tawh a, Sheffield United leh Burnley an tlahniam tawh a. Luton Town pawh tla tluk an ni tawh bawk. Chhiarkawp dan chuan Luton Town hian him theihna hun tha la nei bawk mah se an chungchiaha awm Nottingham Forrest aiin point thumin an hniam zawk a, goal difference-ah an chhe zawk viau bawk. Heti a nih vang hian Luton Town hi tla ngei tura ngaih a ni.

Leave a Reply

error: Content is protected !!