BUNGRAW CHAH, A TAK AWM LO, A KAWR RINGAWT CHAH THLENSAKTU HREM THU + Bungraw man a pe let leh (return) tur a ni

  • Lallunghnema, Charity Lodge

Tun tuma kan thupui hi a har khawp mai. Mipui lo hriat atan ka duh si a. Ka han thai hram a ni. He thu hi Aizawl District Consumer Disputes Redressal Commission Judgement order CC No. 247 2023-a ni.

Mizo nu pakhat Pi Zopari, Aizawl leh Sheyash Retail Limited 2nd Floor, Plot No. 82 Okhla Industrial Estate Phase Floor, New Delhi, South Delhi DL 110020 IN inkhinna a ni a. Judgement Order hi 16/2/2024-ah tih chhuah a ni.

He District Consumer Commission Judgement Order hi President Pu Vanlalmawia, Member-te: Pi E. Lalmuanthangi leh Pu Zomuana ten hming an ziah hnan a ni.

Hetiang hi thil thlen dan chu a ni:

Pi Zopari hian Rs 17648/- man Mobile Phone (Motorola G60 Model phone) Flipkart Online Application kal tlangin a lei a. Complainant thil thawn dawngtu nu Pi Dingi chuan order ID No 01D2246301623359000 chu a hmu ngei a. Mahse, a kawm (case) chauh a ni. A tak (goods) a awm lo a, a ruak (empty) vek!. Complainant chuan he thil hi a lo hriatin a lawm lo hle a. Vawi eng emaw zat opposite Party No I hnenah a complaint a. Mahse, ngaihsak a hlawh lo hle. Chuvangin Complainant Pi Zopari lungawi lo chu Aizawl District Consumer Disputes Redressal COmmission hnenah a zualko ta a ni.

A tawi zawngin kan sawi mai ang a. Aizawl District Consumer Disputes Redressal Commission chuan ngun tak a, a ngaihtuah hnuin Flipcart lamah Deficient Service awm ngeiin a hria a,Opposite Party hi thiam loh a chantir a, Mobile Phone (Motorola G60) man Rs 17, 649/- pe kir tur leh Commission a complaint buaipui nana a senso Rs 5000/- chawi turin Flipkart chu ti ta bawk a ni . He Judgement Order hi ni 60 chhunga tihpuitlin ngei ngei tur a ni.

Pi Pari hi a entawntlak hle a ni. Ka chhuang hle!

Chhiartu duh tak, hei hi lo hre nawn leh teh! Mi zawng zawng Consumer kan ni. Dikna leh Chanvo kan nei theuh bawk. Chu’ng kan dinhmun chu kan pal zut tur a ni lova,kan dah pawimawh tur a ni.

Tlêm lai deuh khan Mizoram chhim chhak lamah Consumer Awareness ka han feh chhuahpui a. Thil leitu leh hmangtute tuarna a nasa hle a ni. Bungraw chhia zawrh leh hralh te a tam a. Buktling lo tih hriat ngawih ngawiha thil hralh leh lei a nasa hle. Online Business- in hmun kilkhawr ber ber a thleng a. Mipui tuarna pawh a hluar hle a ni. Pawl mumal an nei lova, mimal tha hman ngai thawm erawh a ring hle thung.

Consumerte hi Zoram Economy siam thatu kan ni. Corruption do nana hmanraw tha ber kan ni. Awm hman kan ni lo, leng mai mai hman kan ni lo.

Huaisen takin I harsatna chu hmachhawn tum zel rawh!

  • Join Centre For Consumer Education, Republic Veng, Mual Vengchung. – 796001.
    Contact-9862288182/986206215/8247040390
    Aizawl, Mizoram.

Leave a Reply

error: Content is protected !!