Anthurium Festival titawpin Leitlangpui Music Festival buatsaih dawn

Nimin khan ZPM Party chuan an office-ah chhung inkhawmna hun an hmang a, he hunah hian Lalrinpuii Minister, Health and Famiy Welfare, Tourism, Social Welfare and Tribal affairs chuan thu a sawi.

Lalrinpuii chuan, “Thla ruk dawn Sorkarna kan lo chang ve dawn ta reng a, ZPM chu Kalphung thar mipui sorkar a nih ang leh kan Chief Minister-in a lo puan angin Year of Consolidation kan kalpui mek a ni a, Kan party Manisfesto tihlawhtling tur chuan kan kutke ber sawrkar hnathawkte kan policy nen inrem tura kan hrilhfiah a ngai hle a ni. Plan dik tak duan hmasak a, inbuatsaihna tha nen hma kan lak a ngai a. Inbuatsaihna tha awm lo chu hlawhchhamna a nih angin hlawhtlinna hi inbuatsaihnaah a innghat a nih tih hriain theihtawpin kan lo inbuatsaih a ni,” a ti.

“Kan hmachhawp hrang Tar pension cheng sangkhata tih punte, upa leh rualbanlote tana awlsam zawka Civil Hospital-a an inentir theih nan a hranpa counter siam a nih bakah anni bik tan hian Card eng siam sak a ni. Chu mai bakah Rualbanlote tan awlsam zawka office dawr theihna buaipui mek ni bawk. Hun vawn dik chungchangah pawh Biometric attendance kalpui mek a ni a, Ka department chan office hrang hrangah pawh hman mai theih turin kan buaipui mek a ni. MLA-te kan buaina thin em em na pakhat ruang phurh chungchangah pawh budget-ah nuai 500 kan dah tawh a, hei hi Cabinet Meeting hmasa berah min pawmpui turin kan peihfel tawh a ni,” a ti bawk.

Minister chuan a Deparment chan Tourism chungchang sawiin, “Mizoram pawn atangin khualzin tam tak Mizoramah an lo lut thin a, heng khualzinte lo chiau aua lo buaipuitu tur kan dah a. Tin, Mizoram-ah hian Festival pahnih Winter festival leh Anthurium festival hi Central hriatpui festival leh tanpuina pawisa min pek thin a ni a, Anthurium festival erawh mipuiin an ngaihhlut tawk loh nia kan hriat avangin tih tawp a ni a, a aiah Leitlangpui Music Festival hi Lungleiah nei tura hmalak mek a ni,” a ti. “Tin ruihhlo hian kan ram hi nasa takin min run a, Chuvangin hemi kawngah hian nasa takin hmalak kan tum a, Mizoram chhunga Kohhran hrang hrangte, NGOs hrang hrang leh Department thenkhat Official te nen engtinnge heng ruihhlo ngaite leh ruihlo bawiha tangte hi kan enkawl ang tih kan ngaihtuah a ni. Chuvangin heng harsatnate hi sutkiana a awm theih nan, theihtawpa tawngtaina nen kan beih a ngai a ni,” a ti bawk.

Health Minister chuan “Health Care Scheme hi nasa taka zirchian ngai a nih avangin uluk takin vawi tam official-te nen sawiho a ni a, tunah hian mipui huapzo Universal Health Care Scheme hi a taka kalpui a nih theih nan hma kan la mek a ni. He Health Care Scheme-ah hian Cheng nuai 5 (nga) thleng pawisa pek ngai lovin Damdawi Inah kan in enkawl thei dawn a ni,” a ti bawk.

Party chhung inkhawm hi H Vanlalhlua, General Secretary chuan a kaihruai a, C Lalsanglura, Adviser chuan hunserh hmangin Lalmuanpuia Punte, Adviser to CM, JK Dawngzuala, Chairman, ZIDCO; C Lalremliana KVI Board Chairman, MLA-te leh Party hruaitu thahnem tak an kal a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427