LSC LEM 35 TE KHA!

  • Dr. C. Lalrampana

A KAMKÊUNA

Lehkha pawimawh (document) lem, hming ziak (signature) lem, tangka (banknote) lem, lem ziak (art work) lem, lak kai (copy) lem, entawn emaw, thil lem siam, dik lo taka lakchhawn, dik lo taka entawn, Dâwt sawi leh a lem siam chawpte hi lehkha lem ‘forgery’ an tih chu a ni. Hetiang lemchanna khawvel hian zonun zemawi tak hi a chimpil mek a ni. A langa thatna leh mawina pharisai & sadukai nun hian min chim hneh hle a, chhungril nunah erawh takna leh dikna hmuh tur a awm si lo. Inkhawm tam, thawhlawm chihrang ngah, inkhawmpui uar, zawlnei der ngah, political party ruihchilh ching, hriselna ngaihthah, ram hmasawnna aia mahni chhungkaw hmasawnna ngaihtuah, incheina thawmhnaw mawi leh tha changkang pui pui, nungchang mawi erawh hmuh tur awm chuang si lo. A va’n hahthlak tehlul êm!

  • LEMCHAN RAH

Pawi-Lakher Regional Council thin chu Mara Autonomous District Council (MADC), Lai Autonomous District Council (LADC) leh Chakma Autonomous District Council (CADC) -ahte hmun thumah thendarh (trifurcate) niin India ram danpui Sixth Schedule hnuaiah April 29, 1972 khan Autonomous District Council siam a ni. Khata tang khan heng ADC pathumte hian Revenue Department leh department dang dangte an lo nei chho ve ta zel a. Tichuan, Kum 2007 khan India leh Bangladesh ramri hung tura hma lak a ni a. India leh Bangldesh ramri hungna tur atana sorkarin CADC huam chhunga mimal ram a laksakah LSC lem 35 hmangin zangna dawmna la an awm tih hriat chhuah a ni a. Central Bureau of Investigation (CBI) chuan uluk taka chhui zuiin hetih hun laia CADC Revenue Officer Ranga Mohan Chakma chu LSC lem pechhuaktu berah puh a ni a. CADC hnuaia Surveyor pahnihte nen inthurualin ram lak ngai tur hming list pawh dik lo taka siama puh an ni a, LSC pekchhuahho hi sorkar pisa chawlhni a pek vek nia hriat a ni bawk.

Hei vang hian Prevention of Corruption Act, Special Judge Pu HTC Lalrinchhana chuan Land Settlement Certificate, LSC lem hmanga zangna dawmna la mi 23-te thiam loh a chantir a, bail-a lo chhuah lailawk tawh pawh sutin tan ina khung nghal turin thutlukna a siam ta a ni. Heng thiam loh chang ta mi 23-te hìan LSC lem ‘forgery’ hmanga sum tam tham tak an lo hnuh chhuah tawh chu an tihsual rah an seng let ta mek niin a lang.

CADC Revenue Officer & Surveyor-te hian heti zozai LSC lem an siam ngam hi an huaisen hle a tih theih awm e. CBI hian LADC & MADC Revenue Department pawh hi uluk takin chhui ve ta se, hetiang thil dik lo hi engemawzat a man chhuak ve mai thei. Tunge sawi thei awm le?

  • LSC THLAWK THEI

Jan. 21, 1972 khan Mizo District Council chu Union Territory-ah hlankai kan ni a. Feb. 20, 1987 khan UT atangin State-ah hlankai kan nileh tawh bawk. UT/State kan nih hnu tun thlengin kum 52 kan hmang ral mek. Khatih hun chhung zawng khan Land & Revenue Department, Mizoram Govt. hnuaiah LSC lem, LSC thlawk thei, Land least lem etc. hi engzatnge awm tawh ang le? Zangnadawmna lakna tura CADC Revenue Department-in LSC lem 35 a siamsak hi chu nep tak a la ni. Compensation hnam hian CADC tihsual hma khan LSC lem engzatnge Central Sorkar bum nan kan hman tawh ang le? Mizoram State Revenue Department-in LSC thlawk thei; Land least thlawk thei a siam zozaite hi thehkhawm ta chiah ila, India rama truck lian ber leh sei ber chi TATA LPT 4925 & SIGNA 4925 T BS6 49000 Kg GVW phur thei pawhin a phur seng tawh kher lovang. Han en ila, a hmun awm ve ngei ni âwm tak, ram chin zauzawng leh huamchin fel ve thlap, a neitu hming leh hming ziaktu tur zawng zawng pawhin an ziah felsa thlap mahse, a tak hmuh tur awm hauh si lo a ni. Ramchangkangah chuan hetiang ram lem, LSC lem hmanga inbumna (fraud) hi a awm ve ngai lo. A van zahthlak tehlul êm!

  • A TLÃNGKAWMNA

Kan tak lohzia leh adera nung kan nihzia hi a va han lang chiang tehlul êm! Hmanni lawkah Mizoram CM-in lehkha lem (forgery) hmanga zirtirtu 28 lak tawhte banna thupek pawmpuina a ziah hnan tawh bawk. Lirthei neitute’n timna nei hauh lovin lirthei insurance lem an siam ngam bawk. Sawi tur a tam lutuk sawisen a ni lo. CADC chauh ni lovin, LADC, MADC leh Mizoram State Land & Revenue Department-te hi CBI kan ko lut ta bawk a, uluk deuha chhuitir ni ta se, man chhuah tur an ngah viau ta ve ang. Revenue Minister 9 vel kan neih tawhte khan Revenue LSC lem leh LSC thlawk thei/Land least thlawk thei hi an tireh thei miah lova tuna Revenue Minister tal hian he hlemhletna tenawm tak hi titawp ngam se; nge, LSC thlawk thei/Land least thlawk thei neitu zawng zawngte hian inthurualin Land & Revenue Department hi High Court-ah PIL hmangin kan lepse tawh zawk mai dawn em ni? Hetiang renga kan kal zel dawn a nih chuan ADC a ni emaw, State Revenue a ni emaw, LSC lem, a thlawk thei/Land least thlawk theite hi khawvel tawp thleng pawhin chhungtinte’n kan la hum fur dawn tih hi thil chiangsa a ni e.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427