Premier League khaikhawmna

Pathianni zan khan English Premier League 2023-24 khelh zawh a ni a, EPL record thar siamin Manchester City chu a zawnin vawi li an champion. City an champion lai hian Manchester United chuan kum 35 hnua season chhe ber an hmang thung. EPL 2023-24 hmawr bawk nia thil thleng langsar zual kan hrut kual ang.

  • City 3-1 West Ham

Champion tura chak mamawh Manchester City in an mual; Etihad Stadium-ah West Ham United an mikhual. EPL ah a zawna vawi li champion hmasa ber record siam tura chak mamawh City hian bul an tan tha viau a, minute 18 chhung lekin goal hnih an thun hman. Chawlhlawk hmain goal khat chhuah bawk mah se chawlhlawk hnu lamah goal khat an thun belh leh a, 3-1 in an chak.

City tan hian season kal meka khel tha tluang tak Phil Foden chuan Bernardo Silva siamsak atangin hmahruaina goal a thun nghal. Hma taka goal an thun vangin champion tuma inelna boruak thawm a dai nghal rawih. Minute hnihna lekah hmahruaina goal a thun hnuin Foden hian minute 18-naah an goal hnihna a thun zui leh a, City hmahruaina a tizau.

City goal hmasa pahnih thuntu Phil Foden hian EPL 2023-24-ah goal 19 a thun a, assist vawu riat a nei bawk. EPL a season a hman that ber tum a ni a. EPL player of the Season a nih bakah Football Writter Association in EPL player of the year-ah an thlang bawk.

An mualah ngei si hniha hma an hruai vangin City hi awlsam takin an chak zui tura ngaih a ni a, Arsenal tantute an nguai hman hle. Champion tuma inumna boruak tinung thar leh turin West Ham forward Mohammed Kudus chuan minute 42-naah pui zetin a pet goal a, an si phurh a sut then.

Chawlhlawk hmain goal dang luh belh thei lo mah se, chawlhlawk hnu lamah goal a luh belh leh thuai. Minute 59-naah Rodri chuan City goal thumna a thun a, an hmahruaina a tizau nawn leh. Rodri goal thun hnu hian hun tawp thlengin goal dang a luh belh thei tawh lova, Manchester City chu an champion nawn leh ta a ni.

EPL champion thar Manchester City hian khelh atangin point 91 an hmu a, an hnuai chiaha awm Arsenal aiin point hnhihin an sang zawk. Khelh 28 atang hian vawi 28 an chak a, draw vawi 7 an neih bakah tlawm zawkah vawi thum an tang. An khingpuite lakah goal 96 an thun a, EPL 2023-24 ah goal thun hnem ber an ni a. Goal 34 lai an chhuah ve thung.

EPL ah manager ropui ber ang hiala ngaih la ni reng Sir Alex Ferguson-a hun lai meuh pawhin EPL-ah hian vawi li champion zawn thei an la awm ngai lo. Manager ropui Pep Guardiola a rawn lang a, City chu EPL-ah a zawna vawi li champion zawn hmasa an ni a, record ropui tan an siam ta a ni.

  • Arsenal an lawm sual

City an chak loh palh a chamion thei dinhmuna ding Arsenal chuan Emirates Stadium-ah Everton an mikhual a, chak mamawh tak chungin goal chhuah hmasa zawkah an tang. Everton tan hian Idrissa Gueye chuan minute 40-naah pui zetin free kick a chhuih goal. Goal an chhuah hnu lawkah Arsenal in goal an thun nghal zat a, defender Takehiro Tomiyasu chuan minute 43-naah goal thunin an si phurh a sut a, 1-1 a inhnehtawk chungin chawlhlawk an hmang.

Chawlhlawk hnu lamah Arsenal in chak ngei tumin tan an khawh zui a, inkhel hmuhnawm tak an lantir. Second half tantirh lamah West Ham in City laka an si phurh an sut zo tih thu a darh nasa hle. He thu hian Arsenal tantute a tiphur hman viau a, an muala pungkhawm mipui an au ring hman viau bawk. Thuthang dik lo vangin Arsenal an lawm sual a, thu dik zawk an hriat leh meuh chuan City hian 3-1 in hma an lo hruai reng tawh zawk a. An hlimna chu nguina in an hliahkhuh hneh hle.

An mahni tantute an lawm sual hnu hian hun tawp dawn hnaih minute 89-naah Kai Havertz chuan hma an hruai letna goal a thun a, an mualah 2-1 in an chak. Champion thei tura an tih theih ang zawng zawng ti bawk mah se City an chak si vangin Arsenal hi uiawm takin an champion zo ta lo. 2023-24 ah Arsenal hi an khel tha tluang viau a, kum 2024-ah bik phei chuan vawi khat chiah an tlawm. An mualah ngei Aston Villa an hneh loh an tuar a, Villa laka an tlawmna hi an champion loh chhan a ni ta chiah bawk a, an ui rei hle ngei ang.

  • United an chak

EPL team lian zinga beisei phak lo ber Manchester United chuan American Express Stadium ah Brighton an hmachhawn a, si hnih faiin hnehna an chang.

Chak chunga season khar ngei tum United tan hian Diogo Dalot chuan minute 73-naah hmahruaina goal a thun a. Rasmus Højlund chuan minute 88-naah an goal hnihna thun zui lehin, an chakna a nem nghet. United hian chak chungin season khar bawk mah se kum 35 zet hnuah EPL-a an chetchhiat ber tum erawh an pumpelh zo ta chuang lo.

English club ropui Manchester United hian khelh 38 atangin vawi 18 chuah hnehna an chang a, draw vaw 6 an neih bakah vawi 14 zet tlawm zawkah an tang. An khingpuite lakah goal 57 chauh an thun laiin goal 58 zet an chhuah ve thung. Khelh 38 atanga point 60 hmuin pariatna an ni a. Hei hi kum 1989-90 hnu lamah EPL a an hniam ber tum a ni. EPL table-a an dinhmun atang hi chuan Europa conference league tal ngial pawh an khel phak lo va, FA Cup-ah an champion hlauh a nih chuan Europa League an khel phak ve leh hlauh thung ang.

  • Pa 6-naah Chelsea

Hun rei tak chhung beisei phak lo Chelsea chu season tawp lamah an chetha thar a, pangana hial niin season an khar. Table laihawl chhuahsan hleithei meuh lo ni thin mah se season tawp lamah an chak thei ta riau a. Pathianni zanah 2-1 AFC Bournemouth hneh lehin parukna an luah chiang a, Europa League an khel dawn. Chelsea tan hian Moisés Caicedo leh Raheem Sterling ten goal an thun.

  • Luton Town an tlahniam

Tlahniam chiang tluk anga ngaih theih tawh Luton Town chu an mikhual Fulham hneh lovin an tlawm a. An tlawm laiin an chung chiaha awm Nottingham Forrest an lo chak bawk si a, Luton Town chu championship lamah an tlahniam ve leh ta a. Luton hian tlahniam chiang tawh Burnley leh Sheffield United te hnuhng an zui a. Championship lamah hun an hmang ve leh rih ang.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427