Kar tawp football hnuhma langsar

Kar tawp khan tualchhung league hrang hrang khelh chhunzawm a ni a, Pathianni zan khan English Premier League ((EPL) 2023-24 hmawr bawk a ni. German Bundesliga leh French Ligue 1 season khelh zawh a ni bawk. Kar tawpah football a thil thleng langsar zual kan hawl kual leh ang.

  • English Premier League

Khawvela tualchhung league ropui ber, sum tamna ber leh league harsa ber ni bawk EPL chu pathianni zan khan 2023-24 season khelh zawh a ni. An mualah 3-1 a chak Manchester City chu a zawna a vawi li nan an champion a. City hi EPL-ah a zawna vawi li champion hmasa ber an ni. Europe’s top 5 leagues zingah league-ah a zawna champion thei club 12 an awm ta chiah a. Real Madrid chu La Liga-ah tum hnih a zawnin vawi li an lo champion zawn tawh nghe nghe.

EPL 2023-24 ah hian Manchester City tana goal 27 thuntu Erling Haaland chu top-scorer a ni a. Haaland hi Mohamed Salah (2017-18 leh 2018-19) hnu lamah EPL top-scorer ni zawn thei hmasa ber a ni.

EPL ah hian match hnuhnung ber khelh a nih hmain champion an hriat theih tlangpui thin a. Match tawp ber khelh zawhah champion chiang chauh a awm vawi 10-na chiah a ni.

Manchester City champion puitu Pep Guardiola khan club a enkawl hrang hrangte league-ah season 15 chhungin vawi 12 a champion pui a. Europe’s top 5 leagues zingah Pep Guardiola aia League champion ni tam awmchhun chu EPL vawi 13 ngawt Manchester United champion puitu Sir Alex Ferguson chiah a ni.

Chelsea in Manchester City atanga an lak luh Cole Palmer chuan season liam taa inelna hrangah goal 40 a thawkchhuak (goal score & assist) a, Didier Drogba-a’n 2009-10 ah goal 42 a thawhchhuah hnua Chelsea tan goal thawkchhuak hnem ber a ni.

Brighton chuan an starting XI 143 zet an thlak danglam a. EPL season khatah bul tantu thlakkual danglam tam ber dawttu an ni a. An chungah hian Manchester United in 2013-14 (144) leh Manchester City in 2019-20 (144) te an awm.

  • Spanish LaLiga

Kum 18 mi Barcelona rawl thar Lamine Yamal a chetha hle a, season kal mekah goal 10 a thawkchhuak tling tawh a. Kum 15 zet hnuah Europe’s top 5 leagues-a kum 18 miin goal thawkchhuak hnem ber a ni.

Barcelona forward Lewandowski chuan season kal meka inelna hrang hrangah goal 25 a thun tawh a, hei hi season 13 chhung a zawna goal 25 a thun zawnna a ni.

Pathianni zan khan Villreal leh an mikhual Real Madrid te chu 4-4 in an inhnehtawk. Real Madrid lakah hian Alexander Sorloth chuan minute 56 chhungin goal li a thun hman. Real Madrid lakah goal li thun nan hun mamawh tlem ber dawttu a ni a. Emilín chuan September 24, 1944 khan Real Madrid lakah hian Real Oviedo tan minute 50 chhung lekin goal li a thun.

  • German Bundesliga

Bayer Leverkusen chu a vawi khat nan Bundesliga-ah champion in, club record thar an lo siam tawh a. Leverkusen hi Bundensliga-ah season khat chhung tawp tlawm nei lova champion thei hmasa ber a ni bawk. Season lian ta khan Leverkusen hian Bundesliga-ah vawi 28 an chak a, draw vawi 6 an nei. Xabi Alonso a team Leverkusen hi Europe’s top 5 league-ah tlawm nei lova champion thei pasarihna an ni.

Bundesliga 2023-24 an khar zan hian Borussia Dortmund tan Marco Reus chuan goal a thun a. Hei hi Bundesliga-ah goal 120 a thu tlinna chiah a ni.

Season kal mekah German club ropui Bayern Munich an ropui lo viau a, trophy lak an nei lova, kut bengin season an hmang zo. Kum 13 zet hnuah Bayern Munich tel lova German Super Cup khelh hmasak ber tur a ni hial nghe nghe.

  • French Ligue 1

Player ropui Kylian Mbappe chuan PSG tan Ligue 1-a a match hnuhnung ber a khel zo ta a. Ligue 1 top-scorer ni chungin PSG a thlah liam dawn. Tun hi a zawna PSG tan goal thun hnem ber a nih vawi rukna niin, Europe a league lian zual panga zingah club tan season ruk chhung a zawna goal thun hnem ber ni zawn thei niin, Robert Lewandowski a nih rual.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427