Kolasib Excise & Narcotics department chuan Parmi-i (29), North Chhimluang kut atangin Heroin hawng 16 an man.
Thudawn danin Parmi-i hi a pasal, ruihhlo vanga man, Kolasib district jail-a tang mek Henry Biakthansanga chu rannung seh avanga chawlhkar hmasa atanga District Hospital, Kolasib-a enkawl mek kan pahin Kolasib-ah a kal a, Kolasib Parkkawn-ah a thlenna in atangin Excise dept chuan nimin chhun dar 11:50 khan ruihhlo hi an man sak a, ND&PS Act tlawhchhanin thubuai siamsak a ni.
Parmi-i hian a fanu, naute hnute hne lai chu khawsik sang tak a neih vangin Excise dept ten an man hnu chuan District Hospital-ah kalpuiin an lo admit ve leh nghal bawk a, vawiin khan district court-ah hruai a ni bawk.
Parmi-i hnen atang hian Heroin hawng 16 an man te hi avaiin gram 187.95 a rit a ni a, a sawi dan chuan hawng khat hi Rs. 17,000 zela pek tur niin, a hlutna pawh Rs. 272,000 anga chhut a ni.