- George L. Ralte, Vaivakawn
Eizawnna lamah chuan pheikhawk siam mai mahnisela khawvel mihring hmun thuma thena hmun khat hnena chanchintha thlentu WILLIAM CAREY (1760-1834) hian chanchin tha a nghah khawp mai.A naupan laiin tum khat chu sava bu lak a tumna lam ah thingler atangin a tla a, thi lova ruangin in a thleng thei hram a ni.A nuin a hliam te chu thui sakin a pem te chu a tuam sak a, ni eng emaw zat khum ah a mut a ngai ta a ni.Nimahsela a dam that hmain William Carey chuan a hmaa a hlawhchhamna a mi ngei sava bu chu a la leh a lo ni a.A naupan lai atang rengin mi tum ruh leh hrat khawkheng a sawi a ni.
Kum 12 mi a nihin sikul a chawlhsan a, KTP Member ni thei rual kum 14 a nihin a pain pheikhawk siam a zirtir a, hetih lai hian tunlai a tleirawl tam tak ang hian sakhuana lamah tuina a nei mawlh lo va, kristian chhungkua atanga lo piang phei zawng a ni.Nimahsela a hnathawh pui thin, a thian pakhat Warr kristian nun chuan a rilru a tawk ru viau a.Pathian hnen ah chuan a tawngtai ve ta zauh zauh a.Chumi hnuah phei chuan an Pastor kaihhruaina a zarah Carey chu a lo piangthar ta a ni.Pheikhawk chhe siam hna chu thawk zui zel thoin a hnu zelah phei chuan England rama khaw pakhat Pastor a ni zui ta nghe nghe a ni.
Ka hnathawh pui ber chu Krista Lalna ram tih zau hi a ni ti chungin Pastor nih leh pheikhawk siam hna chu a la kawp ta fan a.A pheikhawk siamna hmunah chuan lehkhabu eng lai pawhin a inchhawp reng a, hunawl a neih apiang ah lehkhabu a chhiar ziah thin a ni.Chutiang dinhmun atang chuan Greek tawng te, Latin tawng te, Hebrai tawng te, French tawng te, Italian tawng te, leh Dutch tawng te a zir a ni.
Carey hian thil pakhat chin dawk lak lawh a nei a.A sim theih si loh chu Pathian hnen a tawngtai a ni.Tuk tin mai hian thuthlengah a thingthi in a bang a khawvel map a tar chu a en a, Kristian la hre lo ram te tan Pathian hnenah a tawngtai ziah thin a ni.
William Carey chanchin atang hian thalai te hian zir tur kan nghah khawp mai.A tum ruhna te, a huaisenna te, leh krista tana a inpekna zawng zawng te hi kan entawn atan a tha hle mai.Krista Lalna ram atana a thawhna zawng zawng te hi he khawvel hian a theihngilh thei dawn lova, mite thinlungah a nung reng dawn a ni.Krista tana thawktu thalai te hian miin eng ti zawngin nge min hriatreng ang tih pawh hi ngaihtuah fo ila.I hming hlutna ngaisang i nih phawt chuan mi thate kawm thin la, thian sual kawm aiin mahni a tal hran a duhawm zawk.