COVID POSITIVE KA NIH LAI KHA

  • Mahmuaka Chhakchhuak

Zing karah chuan kan nu nen kan hnar kan va hawlh tir a, ka vawikhat inhawlhna tur a ni bawk a, a za ka tiin ka hahchhiau nasa ngang mai. RAgT hmanga an han test chuan ka lo Positive reng mai niin ‘Ka Pu, i Positive‘ min han ti chu a dawnsawn a nuam lutuk hran lo. Inthlahrunna nei hauh lo leh tawngkam fiahfai takin ‘I Cancer’ pawh min ti zawk nisela ka dawnsawn dan chu a danglam kher awm chuang lo e. Ka pawm lo chuan ‘A dik chiah maw’ ka han ti leh kher a, a ni lah chuan confi takin ‘Dik e’ tiin min chhang leh a, chutah zet chuan ka inpawm thei ta a, CoviD Positive chu ka lo ni ta ka inti a. Chuta ka rilrua thu rawn awm hmasa ber chu ‘He CoviD vang hian ka boral thei a, ka boral lo thei bawk. Pathianin keimahah duh a nei a ni ngei ang’ tiin lawm taka pawm ka tum ta a.  

Nimahsela CoviD hri kai chu natna dang ang alo ni hauh lo mai a, Pathian zarah kan vanneiin a natna ngau ngau chu engmah tham a ni lo zawkin kan palzam thei viau mai. Lu na fek fek a awmin thil ei a tui lo bawk a, kua alo chiang lo thin bawkin taksa pangti kham alo awm bawk chu a ni deuh mai a, kan vannei viau a ni. Chu aia tawrh har zawk leh min tichautu zawk chu a boruak chu niin mi thenkhatte tan phei chuan depression neihna tham hial pawh a ni awm e. Kan taksa natna ber lah palzam mai mai tawk emaw lek a ni a, mahni Inchhungah awm mah ila pawnah chhuah a rem loin thenawm khawvengte lah chuan min rawn ngaihsakin ‘in dam em’ min rawn ti awl lo a. Chawhmeh min suah fo bawkin Phone Call kan dawng awl lo bawk te chuan min ti chauh zual zawk em ni tih tur a ni. Nimahsela chungte chu annite tan chuan an tih ngei ngei tur a ni bawk si a, thil lawmawm leh min lainatna vang a ni bawk si a.

Pathian hnenah tawngtai fan fan lo ila chuan ngaihtuahna tha lo tak tak pawh ngaihtuah awl tak a ni a, chutiang thil tha lo te chu inbawhbeh tir mai pawh awl tak tur a ni. Chuvangin mihring tak pawha routine siam ngaiin ka hre ta a, hetiang hian ruahmanna kan han siam ta a; nitin thu pakhat tal ka ziak tur a ni a, darkar hnih tal lehkhabu ka chhiar bawk tur a ni tih chu taksa enkawlna piah lama nitina tih ngei ngei turin. Pathian zarah kan Positive chhung khan nikhat pawh chawl loin ka tihlawhtling thei kha lawmawm ka ti hle mai a, a chang phei chuan nikhatah thu pahnih/ pathumte pawh ziah theih chang a awm bawk a. Chutihlai chuan ni sawm chhung vel kan inkhung chhung khan a tam zawk chu lu hreng chungin Computer ka thutchilh a, taksa sil them thum nena ka nilen ni hi a tam zawk bawk ngei ang. Mut leh ringawt thin hi thain ka hre si lo a, inchhung dungah ka vei kual zing hle thin bawk a ni.

Mi tam takin CoviD hi an paltlang tawhin zoram chhungah ngei pawh paltlang an tam tawh a, chutih rualin CoviD vanga nunna chan pawh chhiar tham fe an awm tawh bawk a, keini ngei pawhin kan paltlang dawn nge CoviD vang hian kan hnuk hi a chat mai zawk ang tih zawhna pahnih lian deuh awm chuan nitin ka inzawtin a khawi zawk zawk emaw chu kan hmaah a awm si avangin a pahniha hmachhawn thei turin ka inbuatsaih a, ka thlarau lam ngei pawh tihchak tumin nikhatah hunbi neiin tawngtaina ka nei ziah bawk a. Engpawh tawkin, engpawh thleng sela Pathian remruatnaa ngai thei turin keimah ngei pawh inhneh ka tum fan a. Chungte chuan ka thinlungah hmun pawimawh tak changin ngaihtuahna tibuaitu nei loin ka hahdam phah a, zanah luna avangin harh zauh zauh chang awm mahsela tui taka ka mu thei thin pawh cheng tam tak man niin ka hria a, ka lawm hle a ni.  

Pathian malsawmna hi hriatthiam a har thin a, hrehawmna leh natna leh vanduaina te kan tawh avanga vui mai tur kan lo nih loh ziate a takin ka hre thar leh thin. Chutih lai chuan CoviD hri kai ka nih a, positive ka ni tih pawh inhre lo khawpa nilenga buai chang pawh ka nei a. Ni khata thu pathum ziah chang neih phei chuan kan thinlung zawng zawng hi kan pe lo thei lo a, thildang reng hian hmun a chang thei mawlh lo a, midang chimbuaitu nei lo mah ila mahniin dawhkanah lehkhabu chi hrang hrang chhawp hnawkin alo buai theih ve viau thin mai. Nimahsela chu chu tun hnua ka ngaihtuah let leh hian lawmawm ka tiin Pathian malsawmna ni bawkin ka hria a, chutiang chuan buai lo ni ila chuan ka inngaihtuah lungchhia emaw a ni ang a, a tha lo zawngin thinlung ka lo nei palh thei reng bawk a. Pathian hnenah lawmthu ka sawi nawn leh fo thin.   

Ka chhar chhuah taka ropui ber nia ka hriat chu – Mihring hi kan lo chapo hma em em mai a, chapo hi nuam pawh kan lo ti bawk hle mai. Nimahsela Pathian hian chapona thinlung kan neih hi alo hrerengin a duh hunah chuan chapona tlangchhip atang hian min lo hnukthla rang thei viau mai a, engmah kan lo nih loha vaivut ang chauh kan lo nih zawk zia min hriattir leh thin. Amah chu kan mamawh a, a tel loa engmah kan nih loh zia hi min hriattir a tum bawk thin avang hian vaivut atanga siam mihringte hian chapo thei zia zang kan lo nih loh zia hi min hriattir a duh thin alo ni zawk a, chumi hmanrua atan chuan khawvel thiamnain a damdawi ala hmuhchhuah loh CoviD hri hi a hmang a ni ang tih rinna lian tak ka neih phah bawk a. Mi hausa ber ber leh mi rethei ber berte pawhin he hripui lakah hian himna kan mamawh vek a, Concrete Building ropui tak tak leh Di In chhe tak chhunga chengte zawng zawng pawh he hri lakah hian kan him thei bik chuang lo a ni tihte pawh fiah takin ka chhar chhuah phah a, Amah hnenah chauh damna a awm a, amah chauh chu kan damna piah lamah kan hlimna leh kan thlamuanna chu a ni tih fiah takin ka hriat thar phah leh avangin lawmthu ka sawi nawn leh lo thei lo a.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427