Football ngainatute hriat chak England tualchhunga manager tha ber thlanna chu result puan a ni ta a. English Premier League-a Ipswich Town hruai kir lehtu Kieran McKenna chuan Sir Alex Ferguson hnen atangin League Managers Association’s manager of the year chawimawina a dawng.
LMA award dawng thei tur hian Ipswich Town manager Kieran McKenna bakah Manchester City manager Pep Guardiola, Arsenal manager Mikel Arteta, Everron manager Season Dyche, Aston Villa manager Unai Emery leh Portsmouth manager John Mousinho te chhawpchhuah a ni a. EPL a manager hming langsar tak takte khumin, Kieran McKenna chuan LMA award hlu tak a dawng ta a ni.
Kum 28 mi Kieran McKenna hian Manchester United first team a lo enkawl tawh a. December 2021 atanga khan League One team Ipswich Town a enkawl tan. Suffolk club hi League One atangin championship ah a kaisanpui a. 2023-24 season-ah khan a team enkawl hnih pahnihna a nihpui a, kum 22 zet hnuah Premier League-ah an kir leh. A club enkawl hma sawnpui em vangin McKenna hian ngaihven a hlawh viau a, club lian zawkte pawhin an team enkawl turin an awt ru hle. League manager tha bera thlan a nih zui leh tak vangin a hming a langsar zui viau dawn a ni.
LMA award dawng tura rinkai tak, EPL-ah a zawna vawi li ngawt Manchester City champion puitu Pep Guardiola chuan McKenna tluk ta lo mah se, EPL manager tha berah thlan a ni tho thung. Pep Guardiola hi EPL manager tha berah vawi nga thlan a ni tawh a. He chawimawina dawng ngun ber chu Sir Alex Ferguson a ni a, ani hian chawimawina vawi 11 zet a dawng tawh. Women’s Super League lama Liverpool chethatpuitu Matt Beard chuan Women’s Super League manager of the season chawimawina a dawng ve bawk.
Manager tha bera thlan Kieran McKenna chuan, “He chawimawina ka dawn hi ka hun tawna ka ngaihhlut leh ka chhuan ber zinga mi a ni” a ti a. Khawvela League ropui ber EPL hmachhawn a nghahhlelh tawh tak zet thu a sawi tel bawk.