- K. Hmingthankaia
Khi tawngkam khi Mizo mipui, a te ber atanga a lian ber thleng bakah, inchhunga kan vulh Ui leh Zawhte lam hian an hre zingin an ning hial tawh awm e. TV han en ila, mi fing pui pui niawm leh fing vak lem lote, tawn hriat nei tam tawh leh nei tam lote, patling pui pui mi pangngai tak anga langte hian, a theihna hmun apiangah, ” ZPM-in mipui beisei an pha lo. Mipui an beidawng mek” an ti dum dum reng hi enge a chhan i hria em le? A sawi thin tute hian an MAWNG an hlim tih an inhre ngai angem le?
A chhan chu maw- Mizorama Sawrkar chelh tawhtute leh chelh tum ve mekte Party-ah hian Mizo mipui hian beiseina leh rinna pakhatmah an nei thlawt tawh lova, an beidawng tawh lutukin, ZPM party-ah hian an duhthusam beiseina zawng zawng chu thleng dik vek thei se an tih avanga thlang tling an ni. Khitiang thu zak miah lova sawi reng tute lah hian, mipuite hian keimahniah beiseina an nei miah tawh lova, ZPM-ah chauh beiseina an nei sang em em tawh a ni tih nachang lah chu an hre der si lo.
Mahse, ZPM Sawrkar chu India Dan pui hnuaia Sawrkar ve tho an ni a. Chuti maiin ram mipuite duhthusam zawng zawng chu chawplehchilhin an ti nghal zung zung thei bik ngawt si lova. Theih tawp an chhuah reng chung pawhin, a tahtawl te te, a ‘sakal’ a an ti reng chung pawhin, thil tha zawng zawng hi duhthusamin a thleng nghal zung zung thei kher lo tih chu kan hmuhpui ve vek a ni. Chutih karah, mipui leh Sawrkar hnathawk zingah anmahni dodaltu leh er tu, thil tha an ti ang tih hlauva lo bei ve ngat ngattu an lo awm ve bawk si. Sawrkar leh Department thil tihah hian thil hi a tih zung zung thei loh tih hre lo tlemte mipui zingah kan la awm tih hriain, patling pui pui, lal ve chak tawh lutuk hian, chung mite bum tum chuan an au an au ta mai a nih hi.
He khawvel kalphungah hian, Independant Sawrkar pakhat tan chauh emaw, State pakhat tan chauh emaw, hnam pakhat chauhte tana duhthusam ang hian eng thil mah hi a thleng famkim nghal thei lo.
Kan ram, Mizoram ngat phei chu engkim hi a bul atanga tihdik ngai hi a tam tawh em em mai si a. A bul atanga ngaihtuahna thar leh tih dan tur dik zawk, tih dan tur fel zawk, awmdan tur dik leh rilru dik inzirtir kalphungthar hi a bul te atanga tan chhoh bek bek a ngai tawh si a. Chutiang tur chuan ZPM Sawrkar hian hma a la mek a ni tih hi i hriatpui ang u. Nimahsela, engkim hi a tha zawnga her dik nghal tur chuan, zir tur leh tihchhin tur hi a tam em em a, tihsual te pawh a awm bawk ang. Mahse, a tha zawk tur zawnna lama tihsual neih chu a pawi lo, a aia tha zawk hmuhchhuahna zel zawk a ni.
ZPM Sawrkar chetvel dan hi en ila, an hun pum leh an ngaihtuahna leh, an thil tih reng reng hi, a hmaa mite ang lo takin, engkimah hian thil thar tha zawk thlentir tumin an beiin an zir chawp zel reng a ni tih hi a lang reng. Mipuiin beiseina an neih tawh thlawt lohna Party-te ai chuan ZPM-ah hian beisei tur a la tam fe zawk lo maw. Chuti teh vut vuta engkim a dik nghal duak duak loh avanga, ‘ Mipui an beidawng tawh lutuk’ lo tih puam tul reng hi zawng, a lal chak thlakin, a rilru chhiatthlak deuh lo maw.
ZPM hi an at thut lohva, a hmaa mite anga corruption leh mahni leh tute emaw tana pawisa siam dan ringawt atchilh ve lova, tun ang zela thil thar tha zawk leh dik zawk ngaihtuah chung zela, an tihchhin zel phawt chuan, an term khat chhung pawh hian kawng tam takah kal dan phung thar dik zawk leh hmasawn zawk chu a thleng ngei ngei dawn a, mipui engemawzat rilru pawh a lo dik tawh zawk tho tho ang. Tichuan, inthlan leh pawh lo awm sela, beiseina engmah an neih tawh lohna, an hnawl hnu Party-te ai chuan, mipui tam zawk hian an lakah beiseina kan la nei zawk ang.
Chuvangin, anmahni er em em leh itsik leh thik reng ringawt lo hian, kan ram, kan hnam pum tana tha zawk tur lamah hi chuan, Opposition ho pawh hian Sawrkar tawiawm leh fak zawng hian khawsak dan thiam ula, mipui pawh in Party tan in hmin thei letling zawk maithei asin.
Political Party-te chu chungnung zawk leh lalna chan tuma inbeihna, in era, inela, inthlanga, inlal chhawk thinna ramah hian, politic chu thiam taka chhuta, Party ang emaw, a mimala ang pawha chutianga che thiam hmasa apiang chu, fing hmasa leh dingchang hmasa, in tum ber politic lalna chang hmasa tur chu in ni mai.
ZPM hi an mahni tihchhiat tuma bei ngar ngar tute leh er ngar ngar tute laka inven nan leh, Political Party an nih anga Party ngelngheh nan, khawi maw laiah leh eng eng thilah emaw chuan, ram pum tana pawi lutuk lo turah chuan Politic leh Party advantage an lak chu an tih ve tur a ni tih erawh hriatthiampui ila.
Nimahsela, beiseina neih tawh lohna Party-te ai chuan, ZPM hi an langtlang zawkin, an rilru put hmang leh an chetvel dan atang hian beisei tur hlir an la ni zawk lo maw? Khawvel mihring ve tho, Political Party ve tho a ni tih hre mah ila, tunah hrih hi chuan, Mipui pawh hian thil pakhat lek pawh tisual ve thiang lo turah kan dah tak hial rih hi. Engtin nge ni zel dawn erawh kan la hre zel ang chu.