Virat Kohli chuan a khelhpui, Rohit Sharma leh Shubman Gill te khumin ICC Champions Trophy 2025 neih mekah Wikipedia lama zawn hlawh ber a ni.
India captain hlui hi ICC Champions Trophy khelh mekah a che tha hle a, India chu hneh lo nei loin an kal tluang thei a, hetiang dinhmuna an din theihna pawimawh chu Kohli hi a ni.
Kohli hi zawn hlawh dan indawtah a chungnung chiang hle a, vawi 6,61,000 zet an zawng tawh a, amah hnaih bertu chu New Zealand player Rachin Ravindra niin, vawi 2,42,000 an zawng tawh a, an inthlauhna a sang hle.
Pathumna chu Gill niin vawi 2,38,000 an zawng tawh a, Pakistan player Babar Azam chu palinaah awmin vawi 2,12,000 an zawng tawh a, panganaah vawi 2,01,000 an zawn tawh, Sharma a awm a ni.
Tun hnaia batting tha vak lo tia an sawi, Kohli hian Champions Trophy khelh mekah amah sawiseltute hmui a chiptir chiang hle a. India hmelma kumhlun, Pakistan lakah run 100 a siam tling a, final hmain vawi li khelhah run 217 a vaw chhuak tawh a, run siam tamah palina a ni.
Pathianni zana ICC ODI final khelh hmabak, Kohli hi record thar siam thei dinhmunah a ding mek a. India captain hlui, Sourav Ganguly record lo siam tawh a khum lo ang tih a sawi theih loh a. ICC ODI final vawi li khelhah Kohli hian run 137 a siam a, Ganguly chu run nga chauhin a pha lo a. 2013 leh 2017 Champions Trophy final bakah 2011 leh 2023 ODI World Cup final-te khelin, tunah hian final vawi ngana a khel dawn chiah a, record thar hi a siam ngei a rinawm hle.