India chuan a tawp lama New Zealand-in thapui thawha an beih letna dangin Dubai khawpuia Champions Trophy final-ah wicket liin hnehna an chang a, nomawi nen an haw.
Inelna neih chhunga che tha em em, India hian run 252 siam tlun tuma an beihnaah run 17 lek chhunga mi pathum hlohvin an talbuai hman teuh hle a. Heng wicket an hloh zingah hian run 76 siamtu, captain Rohit Sharma leh Virat Kohli pawh telin ani hian run khat chiah a siam.
Shreyas Iyer-a a ding nghet zui hlauh va, run 48 vaw chhuakin Axar Patel-a’n run 29 a thawh bawk a. Patel-a a thih hian run 49 siam la ngaiah ball 51 an la nei.
Hardik Pandya a lo lang a, India chu dinhmun thaah dahin run 18 a tlin a, KL Rahul-a’n thi lovin run 34 vaw chhuak bawkin a tawpah Ravindra Jadeja chuan over khat hmang bângin chakna a vaw chhuak ta a ni.
India hi an vawm hmasakah an vawm vir thiamte an che tha hloh va, New Zealand chu run 251 siamtirin mi pasarih an vawm hlum a ni.
Hnehna an chan rual hian India hi khawvela white-ball team-ah chuan a tha ber an nihna an nemnghet.
2023 World Cup final-a an tlawm hnuah India hian T20 World Cup leh Champions Trophy-ah an champion tawh a, tun hi kum 2013 hnua an champion vawi thumna a ni ta.
Tun tum inelna hi Pakistan-in thleng mah se India hi a zin duh loh avangin Lahore-a final khelh tur pawh Dubai-ah sawn a ni a. India team hi mipuiin an thlawp thain halmawi ropui tak tak nen an thawk chhuak a. Chakna run vuak chhuah rual hian mipui an phusak piah lamah player-te pawh khelmualah tlan lutin an phusa nasa hle bawk.
India captain Rohit Sharma chuan, “Tournament chhungin kan khel tha a, hnehna kan chang hi a ropui tak zet a. Mipuiin min thlawp tha em em hi a pui a, kan khelmual ni lo mah se kan khelmual ang maiin an siam thei a ni,” a ti.
New Zealand captain Mitchell Santner chuan, “Tournament tha tak niin ka hria a. He hmun kan thlen theih nan hian thil hautak tak tak kan paltlang a. Kan khel tha a, keini aia tha zawk lakah kan tlawm a ni,” a ti.
India team fakin, “An khelh dan kha a fakawm a, world class spin bowler an ni. Kan duh aia run 20 velin kan siam tlem a; mahse, kan dang thei teuh hle tho,” a ti.
India batter Kohli chuan, “Heng thalai tak takte nena khelh hi a nuam a. Talent an nei tha a, Indian cricket hi hma lam panin an kalpui dawn,” tiin a thiante a fak.