UEFA chuan tun hnaiah khan Chelsea team neih tawh zawng zawnga man to ber chu 2024 squad kha an nih thu an puang.
European Club Finance & Investment Landscape inhmuhkhawmnaah UEFA chuan he mi chungchang hi an chhut chiang a, player leina atanga an chhutin Chelsea 2024 squad chu an squad neih tawh zawng zawnga man to ber an nih thu hi an puang a ni.
Europe khawmualpuia league sang hoa team hrang hrangte player lei dan an zir chiang a, hetah hian English club-te chu player leina atana pawisa hmang hnem ber an ni.
Player leina atana English club-te pawisa hman hi kum 2023 aiin 17% zetin a pung a, club hrang hrangte pawisa hman zawng zawng belh khawm chu € tluklehdingawn 2.1 ($ tluklehdingawn 2.2) zet a tling a. Khawvela squad man to 20 thlan chhuah zinga pakua chu Premier League atangin a ni.
Chelsea chu a chung berah an awm a, 2022 nipui laia Todd Boehly leh Clearlake Capital ten club an enkawl hnuah bazar hun vawi ruk inhawnah player 41 zet an la lut tawh a ni.
2024 financial year tawpa Chelsea squad man chu a to hle a, player leina vela an pawisa hman zawng zawng belh khawm chu € tluklehdingawn 1.656 zet a tling a, 2023-a Manchester United-in € tluklehdingawn 1.422 an hman chu an khum.
July, 2019 atanga June, 2024 chhungin, kum nga chhunga Chelsea-in player leina atana pawisa an hman hi Europe khawmualpuia club dang zawng zawng aiin a sang a. Anmahni hnaih bertu chu Manchester United (€ tlukehdingawn 1.175) niin, pathumna chu Arsenal (€ tluklehdingawn 1.145) an ni a. Barcelona (€ maktaduai 733) leh Liverpool (€ maktaduai 657) te chu an hnuaiah an awm a ni.
Boehly leh Clearlake Capital hnuaiah player leina atan pawisa hmang hnem viau mah se khelmual lamah boruak an nei fuh em em lo hle a, Champions League an khelh phak loh bakah trophy pawh an la thei rih lo.