Finance changtu, Chief Minister Lalduhoma chuan Mizoram sorkarin tun dinhmunah leiba Rs vbc 12,082.26 a nei tih a sawi a; MR bill an dawn chin chu tun financial tawp hmain an clear vek dawn tih a sawi.
Nimina assembly session zawhna leh chhanna huna Sialha bialtu MLA Dr K Beichhua zawhna chhangin chief minister chuan Mizoram sorkarin leiba (debt stock) a neih hi tun dinhmuna data awm thei Actuals 2023-24 ang chuan Rs vbc 12,082.26 a nih thu a sawi a. Nikum tun ang hun nen khaikhinin tun sorkar kum kal meka leiba chu Rs vbc 12,082.26 a ni tih a sawi a. Nikum tun ang hun nen khaikhinin tun sorkar kum kal meka leiba chu Rs vbc sang chuangin a tlahniam tih house a hrilh.
Ba a neihte chu Market Borrowings atangin Rs vbc 5,871.41; sorkar laipui atanga loan an lak atangin Rs vbc 1,774.36; NSSF atangin Rs vbc 102.82, financial institution leh bank hrang hrang atangin Rs vbc 954.87 leh Public Accounts Liabilities atangin Rs vbc 3,378.80 a nih thu a sawi bawk.
Zawh belhna chhangin chief minister chuan, nikum tun ang hun nen khaikhinin 2024-25 financial kal meka Mizoram Budget Estimate aiin Revised Estimate chu Rs vbc 1,003.94-in a tlem zawk tih sawiin, nikum aiin tun sorkar kumah leibat zat chu Rs vbc sang chuangin an tlahniam tihna a nih thu a sawi.
Chief minister chuan sorkar hnathawkte MR bill chu lut leh chhuak reng a nih avangin eng emaw zat an la ba a. An dawn chin chu tun sorkar kum tawp hmain an clear vek dawn tih a sawi a. GPF bik hi tunhma kha chuan a pe thei tur chin bik mi pathum/pali ruat an ni thinin, sawi neuh neuh a awm a, tun sorkar thar hnuaia a buai ta lo vuai a. A tlangpui thuin an pe thei tih a sawi a. Amaherawhchu, lut reng chhuak reng a nih avangin clear vek thei dinhmunah an ding chiah lo tih a sawi.
Pension chungchang pawh chief minister chuan pension benefit tihfel loh a tam lutuk chu manganpui tham a awm tih a sawiin, “Amaherawhchu, kan senior-te an nih avangin ngaihsak tur kan ni a. A buaipui tur bik eng emaw zat an inruat a, pension pakhat tihfel zelah lawmman pek an ni a. Tunah chuan kan pe thei deuh zel a. Lut leh chhuak reng a nih avangin, a vaia pek zat sawi theih a ni lo,” a ti bawk.