Aizawl: School Education Minister Dr Vanlalthlana chuan hmun hrang hrangah school building tihchangtlun hna thawh a that theih nan headmaster-te chu school sak hna a chhia a nih chuan completion certificate pe lo turin office order tihchhuah a nih thu a sawi.
Thawhlehnia Assembly Budget Session-a zawhna leh chhanna huna Lawngtlai West bialtu MLA C Ngunlianchunga zawh belhna chhangin Dr Vanlalthlana chuan sorkar term hmasaa tih ngai loh angin, school sak hna a chhia a nih chuan headmaster-te chu completion certificate pe lo turin nikum May thla khan office order tihchhuah a nih thu a sawi a. “Sorkar hmasa lamah kha chuan, completion certificate sign loh chuan ‘kan sawn dawn che’ tih chu headmaster-ten an dawn thin a ni. Keiniah chuan headmaster-te sawn lam ni lovin, completion certificate sign loh tur tih a ni. Chu chu kalphung thar chu a ni,” a ti.
Minister chuan ZPM sorkar hnuaiah hnate a tha tur a ni a, headmaster hna pawh a sang sawt a. Headmaster-te sawn tura tihna lam ni lo vin, a that loh chuan completion certificate pe lo tura order an siam tih a sawi a. Hna a chhe chunga a mawhphurtu JE leh headmaster-ten completion certificate an pe chhuak a nih chuan an ko dawn a, tunah pawh koh an awm tawh tih a sawi.
Dr Vanlalthlana chuan nikum khan VSKMizoram.com tih chu tlangzarh a nih thu sawiin, “Chutah chuan School Education department hnuaia school sak hna hrang hrang tihthatna, thawh tawh leh thawh mekte a lang a. VSK Mizoram Control Centre-ah tun atang chuan electrification atanga tanin school sak tur leh tur ho kar tin a thlalak an update ang a. Estimate emaw, a siam tur emaw, school building-te nen a lang ang,” tiin, chu chu kalphung tharah chuan an kalpui tawh dawn tih a sawi.