Aizawl: Nilaini chawhnu dar 2 khan Central YMA Committee Room-ah YMA Village Profile Apps chu Central YMA President Lalhmachhuana in a tlangzarh.
Central YMA Asst Secy Fabian Lalfakawma kaihhruai tlangzarh inkhawmah hian Central YMA President chuan thu sawiin, YMA chuan tunlai khawvel thang chho zelah YMA te pawh hma an sawn chho zel a. YMA member mai ni lo, vengchhung/khaw chhunga mihring chengte dinhmun kimchang dah khawmna tur Village Profile an nei thei ta hi a lawmawm a tih thu a sawi a. YMA-in bung thar a kai dawn nia a lan thu sawiin, Branch YMA ten veng mipui chhinchhiah a kum tin an ziah thar thin chu a ngai tawh dawn lo tih a sawi. YMA-in hmasawnna kawng a zawh zel chu lawmawm a tih thu a sawi bawk.
Central YMA Gen. Secy Prof. Malsawmliana pawhin thu sawiin, Village Profile Apps hi Lailen Consulting Private Ltd siam a ni a. Mizoram sorkar nen tang tlanga siam a nih thu sawiin, hei hi YMA mai bakah sorkar tana data tangkai tak a la nih tur thu a sawi.
Village Profile siamna atan hian Home Department atangin Rs. nuai 10 dawn niin, hei hian a siamna mai bakah kum engemaw chen a enkawl zui zelna tur a nih thu sawiin, home department chungah lawmthu a sawi.
Village Profile App hi Aizawl city branch parukah hman chhin phawt tura ruahman a ni a, a siamtu Lailen Consulting Pvt. Ltd atangin inhrilhfiahna hun hman a ni bawk.