Arsenal chuan Bukayo Saka chu kum hnih chauh contract a neih tawh avangin an forward hi ziah belh tura dawr an tum.
Saka hi December khan Crystal Palace laka Selhurst Park-a hnehna an chan tumin a chawn tha a tihthler a, a la inkhel leh thei lo va. A hliam hi zai ngai chi a ni.
Rei tak inkhel tawh lo mah se Mikel Arteta-a team-a a pawimawhna a la dang chuang lo va, club hian a aiawhte dawra contract pawh sei dan tur sawipui an tum.
Arsenal hian an star player hma hun chiang lova dah an duh lo va, Saka hi hun rei tak daih contract ziahpui chu an tum lian ber pakhat a ni.
Kum 23 mi, England international hian tuna a contract neih mek hi kum 2022-a a ziah kha niin season khatah £ maktaduai 10 tal hlawh turin an inrem.
2026-27 season tawp rualin a hmang zo dawn a, a hma thei anga inbiakna neihpui an duh a. Hun rei an nghah a rinawm loh.
Saka hi European football-ah chuan lehlam nawrtu atana tha ber zinga mi a nih mek avangin club nena an indawrna thu hi club dang tam takin an ngaihchan rin a ni.
Tuna a contract mek a ziah hma khan Saka hi Manchester City pawhin an duh tih a awm a, tunah hian an indawrna a kaltluang lo a nih chuan an chet thuai rin a ni.
Hetih lai hian Arsenal chuan an player pawimawh hi inremna an ziahpui ngei an inbeisei thung.