Manchester City midfielder Kevin De Bruyne chuan Europe khawmualpuiah tu mahin cricket khel an en ngai loh thu a sawi.
England rama game show pakhat, AI Showdown an tihah de Bruyne hi a tel a, hetah hian Belgium midfielder chuan zawhna chi hrang hrang a chhang.
Europe khawmualpuia infiamna lar zual panga sawi tura an tih chu chhan harsa a ti deuh a, a zawttu chuan a chhanna a hrilh a. Heng zingah hian cricket a sawi tel a, hei hi De Bruyne chuan a pawm lo hle.
Zawhna zawttu chuan Europe khawmualpuia infiamna lar zual pangate chu football, cricket, basketball, tennis leh Formula 1 te an nih thu a sawi chhuak a. Hei hi de Bruyne chuan mak a ti hle a, cricket lang tel ve chu a awih thei tlat lo a ni.
De Bruyne chuan a pawm thei ngang lo a, “Engtin nge cricket hi lar ber dawttu a nih theih? A ni thei lo, hei chu dawt a ni,” a ti chhuak hial.
“Dawt sawi miah lohah chuan Europe khawmualpuiah tu mahin cricket an en ngai lo. Chuvangin, infiamna lar zual panga zinga a tel pawh mak tih tawh tehreng nen, pahnihnaah i la dah zui a, hei chu a ni thei lo,” a ti.
A sawi zelnaah, “Infiamna chi hrang hrang hi chu ka en deuh vek a, cricket chiah hi ka en ngai lo. European-ho pawh hian an en meuhin ka ring lo a ni,” a la ti cheu bawk.
De Bruyne hian cricket chu a ngaisang lo viau a ni.