Mizoram chhungah license nei football coach 219 an awm mek a, Mizoram hmun hrangah coaching pein an feh chhuak thin.
License nei coach-te hian kum 2019 khan pawl, Association of Mizoram Football License Coaches (AMFLC) an din a, an pawlah hian Asia Football Confederation leh (AFC) leh All India Football Federation (AIFF) hnuaia football coach license neite an tel.
AMFLC-ah hian member 219 an awm mek a, kum tin an pung a. Coach-te hi Mizoram hmun hrang hrangah coaching pein an feh chhuak reng a, Mizoram Football Association (MFA) nen tangkawpin football-in hma a sawn theih nan an bei mek a ni.
License nei coach-te hian kum tin infuihtharna leh inhmuh khawmna, AMFLC General Body Meeting an nei thin a. Inrinni khan Hotel Ransam, Thuampui Vengthar, Aizawlah a vawi nga nan an thukhawm.
Hetah hian 2024-2025 season kal mek an member zinga ram pum huap leh Mizorama inelnaa an team champion-pui theite hnenah chawimawina an hlan.
Thutkhawmah hian P.C.Vanlalhruaia, Sr. Vice President, MFA chu khuallian license nei coach-te chu professional level, Indian Super League (ISL) leh I- League thlenga kal tura tan la turin a sawm a, “Mizopa ngei AFC/AIFF hnuaiah professional coach kan neih chuan Mizoram football-in hma a sawn leh zual ang,” a ti.
Tunlai football khawvelah license nei coach-te an pawimawh tulh tulh avangin MFA hnuaia tournament-ah pawh license nei lo chhawr theih tawh loh tura kalpui zel a ni tih a sawi a, “Chuvangin, license nei coach-te pawhin hma sawn zel tum ila, kan license neih lai aia sang nei zel turin theihtawp chhuah zel ang u,” a ti.
AMFLC General Bogy Meeting-ah hian special guest-ah H.Rotluanga (Mapuia, Zephyr) sawm a ni a, coach pawimawhzia leh mite chawikangtu an nihna leh ngaihhlut an ngaihziate a sawi a. Coaching an pek naah rate sang zawk an neih a tul thu leh inthurual taka kal a tul thu a sawi bawk.
Women & Child Development Directorate-in awarness campaign an nei a. “Hmeichhia leh naupangte intluktlanna te, sports-ah pawh hmeichhe hamthatna nasa zawka awm theih nana tanlak a ngaihzia te, mipa ang thoa dinhmun tha sports-ah chelh ve thei an nihzia te, hemi kawngah coach-ten mawhphurna lian tak an nei a ni,” tiin hmanpuitu, Flora Laltanpuii, Deputy Director chuan a sawi.