Manipur Governor Ajay Kumar Bhalla chuan Pathiani khan an state-a lungawi lohna lantirnaa tharum thawhna thleng mek karah sorkar hotu liante ko khawmin venhimna dinhmun an thlir.
Thutkhawmah hian an state-a dan leh thupek kenkawhna kalpui mek dinhmun leh hma thar lakna turte sawihovin an thlir a ni.
Security Advisor, Director General of Police (DGP), Commissioner (Home), Secretary to the Governor, Additional Director General of Police (Law & Order), IGAR (S), Inspector General, CRPF leh sorkar hotu pawimawh tak tak an tel.
Raj Bhavan thuchhuah chuan governor hian BJP, NPP leh Congress aiawh MLA 25-te a kawm bawk.
“Vawiin khan Governor Bhalla-a’n Raj Bhavan-ah MLA rualte kovin MLA-te hian state chhunga dan leh thupek kenkawh dinhmun an thlen a, muanna tha zawk a awm theihna tura inrawlha hma la tura ngenna an thlen,” tiin Raj Bhavan chuan thu a chhuah.
Governor hian MLA rualte hnenah hian ‘harsatna hrang hrang awm leh buaina awmte titawpa nun a pangngai leh theih nan a tul ang apiang tih’ a nih thu a lo hrilh bawk.
Manipur-ah hian Inrinni zan khan hmun hrang hrangah Meitei pawl, Arambai Tenggol hruaitute man duh lohna lantir a ni a, he thil thleng avang hian thuneitute chuan Imphal phaikuama district pangaah inkhuahkhirhna tichhuakin internet service pawh an titawp rih.
MLA rualten governor an hmuhnaah hian tun hnaia Arambai Tenggol hruaitu, Asem Kanan-a man chungchang pawh hi an sawi.
BJP MLA K Ibomcha chuan tun hnaiah a hma lama tharum thawhna thleng kaihhnawihah mi panga man an ni a, hei hian Inrinni atang khan hmarchhak state pumah lungawi loh lantirna hi a hring chhuak tih a sawi.
CBI chuan Pathianni khan Meitei pawl, Arambai Tenggol member pakhat chu Imphal Airport-a an man thu leh ani hi kum 2023-a Manipur-a tharum thawhna thleng hrang hrangah a inrawlh nia an hriat thu an sawi a. Police chuan mi dang pali man chungchang hi engmah an sawi lo thung.
Khundrakpam MLA Lokeswore-a chuan governor an hmuh zawh hian Kanan-a man chu Arambai Tenggol nen inkungkaihna a awm loh thu thuthar lakhawmtute hnenah a sawi.
Arambai Tenggol chuan ni 10 chhung total shutdown an puang a, hetih chhung hian sorkar pisa zawng zawng pawh khar turin an ti a, hei hian buaina a tihpunlun rin a ni.
Hetih lai hian Manipur Rajya Sabha MP Leishemba Sanajaoba leh chief minister hlui, N Biren Singh te chu New Delhi-ah kalin Manipur buaina chungchang hi an party hotute hnenah an thlen dawn niin sawi a ni a. An mi hmuh tum zingah Union Home Minister Amit Shah pawh a tel.
Hmunpui lama an thu thlen tur zingah hian muanna a awm leh theih dan tur, sorkar nghet din leh dan tur leh vantlang mamawh hrang hrangte a tel dawn nia sawi a ni.
Sorkar laipui chuan Chief Minister Singh-a bân hnu lawk, February 13 khan Manipur-ah hian President’s Rule a puang a. State assembly pawh kum 2027 hun la nei mah se engmah tithei lova dah rih a ni.