Russia leh Ukraine in mitang inthleng tawn dawn

Moscow-in indonaa mi an inmansak inthleng tawn an rem tih tawh chu Kyiv-in tiamchian awm lovin a sawn hla nia sawina chhangin Ukraine-a intelligence chief chuan karlehah inthleng a ni dawn tih a sawi.

“Istanbul-a inremna siam tawh angin mi tang inthleng hi karlehah tih a ni dawn a, Thawhlehni khan a buaipuitu turte pawh hrilh an ni tawh,” tiin military intelligence chief Kyrylo Budanov chuan Pathianni khan sawi.

“Hmelma lamin eng eng emaw thu dik lo tak tak tak thehdarh mah se ruahman angin thil a kal zel,” a ti.

Russia chuan Inrinni khan lehlam lehlama sipai ruang 6,000 leh mi an inmansak zinga kum 25 hnuai, damlo na zual leh hliam na zualte inthleng tura inremna lo neih tawh chu Ukraine-in tiam chin awm lovin a hun a sawn niin a sawi a ni.

Thawhtanni kal taa Turkish khawpuia an inbiakna sawi langin Budanov-a chuan Ukraine hian ‘uluk takin Istanbul-a inremna siam tawh angin thil a kalpui’ tiin Moscow puhna hi a chhang a ni.

Hetih lai hian Russia chuan Ukrainian sipai ruang 1,000 chuang an inhlanna hmun turah an phur thleng a, mi tang an hlan hmasak tur mi 640 hmung pawh an pe tawh tih a sawi a, inhlanna hmun turah hian Ukrainian aiawh an lo awm lo niin a sawi bawk a. Ukraine chuan phain Moscow chu ‘game bawlhhlawh tak tak’ khel tawh lo turin a ti.

Russia leh Ukraine hi February, 2022-a an indo hnu atangin tun hnaiah vawi hnih an inbe tawh a; mahse, inkahhai puan tumna lam hawi a la awm thei lo.

United States phei chuan indo titawp tura na taka nawrin President Donald Trump-a phei chuan a ngenna an zawm loh avangin a dawhthei lo tan hle tawh.

Trump-a mai ni lovin Ukraine-in a thawhpui, European Union leh United Kingdom te pawhin indo tihtawp a nih loh chuan Russia chu na zawka hrekah an vau tawh bawk.

Mi tang erawh Istanbul-a an inbiak hmasak khan inthleng rem an lo ti tawh a, an inthleng nual tawh a. Tun hi a vawi hnihna tur a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427