Chief Minister Lalduhoma’n nimin khan Irrigation & Water Resources Department Auditorium, MINECO-ah World Bank suma din Mizoram Water Informatics Centre leh Tlawng lian tur hriat lawk theihna a hawng.
Chief Minister chuan hmun 82 atanga tui data chi hrang hrang, darkar tina hrilh hre thei centre changtlung tak hawn a ni ta chu lawmawm a tih thu leh scientific lama ram hmasawnna chhinchhiahtlak a nih thu sawiin, “National Hydrology Project hnuaia National Water Informatics Centre chuan state zawng zawng mamawh a phuhruk zo lo va. State Centre lo neih theih hi central sorkar lam duh dan a lo ni bawk nen, he centre din hi kan remti ta a. Sum leh pai hi World Bank lamin an tum a ni,” a ti.
Chief minister chuan furah tui pump theih loh ni a lo thleng fo va, ruahtui tam tak dawng siin tui an nghei lek lek thin tih a sawi a. Aizawlah phei chuan AMC-in ruahtui dawn khawmna nei lo tur chu insak phal tawh loh tihte ngaihtuahna a neih thin thu a sawi.
Data dik leh rintlak neih chu project rintlak siam tura an mamawh hmasa a ni zel tih sawiin Lalduhoma chuan, tuiah chauh ni lovin thil dangah pawh data dik nei turin department te a chah thin thu a sawi a. “Budget kan pharh pawhin data dik tak hmang turin thawktute ka hrilh. Kan lan danah kan lo tlahniam deuh a nih pawhin kan dinhmun dik tak hriat tluka hlu a awm lo. Data dik kan neih hian kal dan tur dik kan duang chhuak thei dawn a, data dik lo behchhana project siam chu dawt rinchhana thusawi ang tho a ni,” a ti.
Chief minister hian Tlawng lui lian tur hriatlawk theihna (Tlawng lui Early Warning System) chu a hawng nghal a. He system hi DM&R department nena enkawl tur a ni.
Hawnna inkhawmah khualzahawm PC Vanlalruata, IWRD Minister pawhin thu a sawi a. Lalthansanga, Minister, EF & CC, Lalfamkima, Deputy Speaker, MLA, official leh sawm bik te an tel a ni.