Aizawl: BJP Mizoram President Vanlalhmuaka chuan Mizoramah BJP-in sorkarna a chan loh avanga mipuiin an chan tur ang an chang thei lo thin chu pawi a tih thu a sawi.
Thawhtannia an party pisa-a chawlhkar thar inhlanna leh political session an hmanah BJP Mizoram President Vanlalhmuaka chuan, Mizoram politics tana hmun pawimawh Lunglei khawpuiah BJP zawm thar an awm chu lawmawm a tih thu a sawi a. Chhim lamah hmasawnna tuihalna avanga harhna thleng mek hian hmar lam pawh a tuam zel dawn avangin, hmasawnna thupuia neitu BJP chu an hnawl nawn fo tawha a rinawm loh thu a sawi.
Vanlalhmuaka chuan Mizoramin hmasawnna tha leh rotling a neih mekte chu PM Modi kaihhruai BJP hnuaia hmuhte a nih thu a sawi a. Sairangah rel lo lut thei te, double lane kawng laih mek te, Aizawl traffic jam tiziaawm tura Aizawl by-pass road atan sum pek a nih tawh thu leh hnathawh mek a nih thu sawiin, “Hmasawnna ruhrel hi BJP sorkar hnu hian nasa takin kan dawng a ni,” a ti.
BJP Mizoram President chuan PM scheme kaltlangin nasa takin mi retheiten hamthatna dawng mah se, a nihna anga hman thin loh avangin vawiin thlengin an chhawr thei thin lo tih sawiin, “A bikin housing for all hmanga in sak tanpuina dawng te’n an la sa zo thei lo a ni. Heng zawng zawng thlir hian Mizoram mipuite hi kan harh a hun takzet a, BJP-in sorkarna kan chan loh vanga kan chan tur ang kan chang thei lo thinte hi a pawi tak zet a ni,” a ti.