India rama cricket enkawltu pawl, Board of Control for Cricket in India (BCCI) hi khawvela infiamna pawl hausa ber tih thin a ni a, an hruaitute chet velnaa sum sen pawh a tam hle a, an inenkawlna pawh a hautak ti zawnga sawi tan pawh a hautak hle.
BCCI office bearer hi panga an awm a, president, vice president, secretary, treasurer leh joint secretary te an ni hlawm.
An inkaihhruainaah chuan heng office bearer-te hi ram danga an zin chhuak a nih chuan ni khatah $1,000 (India-a Rs. 85,743 vel) an hlawh thin a. A hmaa ni khata $750 hlawh thin kha an ni a, October, 2022-ah khan hei hi an ennawn a, ni khata an hlawh zat hi an tisang tawh a, kum sarih chhunga an siam danglam hmasak ber a ni.
An zin chhuah reng reng hian thlawhtheihnaa an chuan pawhin first class-ah zel an chuang thin bawk.
India ram chhunga an zin kualnaah chuan BCCI president leh OB dangte chuan ni khatah Rs. 40,000 zel an hlawh thin a. BCCI hna tul vanga zin kual an nihin ni khatah Rs. 30,000 an dawng thin bawk a. Khualbuk velah pawh pindan changkang ber berah zel an thleng thin a ni.
Indian Cricketers Association aiawhte telna, BCCI Apex Council member-te pawhin meeting nei tura an inhmuhkhawmin ni khatah Rs. 40,000 zel an hlawh thin a, ram pawn lama an zin chhuahin ni khata an hlawh chu $500 a ni bawk.
Cricket Advisory Committee-te chuan meeting an neihin Rs. nuai 3.5 an dawng thin a, ram danga an zin chhuahin ni khatah $400 an dawng thin a ni.
President ni mek, Roger Binny chuan kum 70 a tlin ni, July 19, 2025-ah president a nihna a chawlhsan tawh dawn a, vice president ni mek, Rajeev Shukla chu a hmun ruak luahtu tura rin kai ber a ni.
Binny hian India captain hlui, Sourav Ganguly chu October 18, 2022-ah khan thlakin BCCI president nihna hi a chelh tan a, president 36-na chiah a ni.