Aizawl: Election Commission of India (ECI) Deputy Director (Media) Apurva Kumar Singh chuan Ningani chawhnu khan Reiek a tlawh hnuah Aizawl Press Club-ah thuthar thehdarhtute kawmin Special Intensive Revision (SIR) 2026 chungchang leh a kalphung a sawi fiah.
Singh chuan SIR 2026 hi India ram pum huap electoral roll dik, felfai leh rintlak siam tumna beihpui a nih thu a sawi a. “Mizoram chu Phase III-naah telin May 30, 2026 atang khan Enumeration Phase hi tan a ni a, Booth Level Officer (BLO)-ten in tinah kalin Enumeration Form sem leh khawn khawm hna an thawk mek a ni,” a ti.
India khua leh tui, vote nei thei zawng zawng electoral roll-a an chuan vek theih nan ram pum huap field-level election official tam tak ruat an nih thu sawiin, Mizoram-ah pawh BLO-te, political party tina BLA-te leh election official-ten danpui zawm chunga in tina hmalakna an kalpui mek thu a sawi bawk.
ECI deputy director chuan Mizorama hmalakna hmuh a nih dante a sawi fiah a, Chief Electoral Officer leh a thawhpuite, DEO, ERO, BLO leh media-te zawng zawng chungah lawmthu a sawi a. Mipuite pawh Enumeration Form te uluk taka fill up-a a hun chhunga thehlut ngei turin a ngen a ni.
Singh chuan enrolment leh kumtling tharte inthun dan chungchangte a sawi fiah a, SIR 2026 a hlawhtlinna tur hian media-te chu theihtawpa election official-te thawhpui turin a sawm a ni.