Mizoram sorkar hnathawk, New Pension Scheme (NPS) hnuaia awmte chuan Old Pension Scheme (OPS) hman phutin Thawhtanni hian a huhova chawlh, ‘mass casual leave’ an la dawn.
Mizoram Movement for Old Pension Scheme (MIMOPS) hruaitute sawi danin sorkar laipuiin kum 2004-a New Pension System (NPS) a hman hnuah Mizoram sorkar pawhin kum 2010 khan a hmang ve tan a. Sorkar laipui chuan pension system hi vawi duai lo en nawnin tunah chuan NPS aiah Unified Pension System (UPS) a hmang leh tawh a. Hetiang a nih laiin Mizoramah kum 2010 atanga vawiin ni thleng NPS thlakna emaw, ennawnna emaw pakhatmah a la awm lo va, hei hian sorkar laipui hnuaia thawk leh Mizoram sorkar hnuaia thawkte dinhmun a ti-inthlau hle tih an sawi.
MIMOPS chuan OPS hman an phut chungchangah hian sorkarin October 27, 2023 khan ‘NPS Study Committee’ a lo din tawh thu an sawi a. Amaherawhchu, he committee zirchianna atanga rawtna an theh luh finance department-a awm tawh chu kum khat a liam hnuah pawh sorkarin thutlukna mumal tak a la siam lo chu pawi an tih thu an sawi bawk.
MIMOPS chuan Thawhtanni-a mass casual leave an kalpui tur hi sorkar dodalna a nih loh thu leh, sorkar hnathawkte tana pension tha lo tling, NPS thlak an ngiatna a nih angin sorkar lakah nghawng tha tak nei se an duh thu an sawi.