Aizawl: Supreme Court chuan Constitution leh Representation of the People Act hnuaia Election Commission of India (ECI)-in Electoral Roll ennawnna beihpui Special Intensive Revision (SIR) hmanga voter list a enfiah thin chu thlawpin, he hna kalpui tura ECI thuneihna chu a pawmpui.
Chief Justice Surya Kant, Justice Joymalya Bagchi leh Justice Vipul M. Pancholi te bench chuan, zalen leh dik taka inthlanna atan voter list rintlak neih chu thil pawimawh hmasa ber a nih thu an sawi a. Supreme Court chuan SIR an kalpui lai hian tuma hming dik lo taka paih a nih loh nan, chhanna pe tura hriattirna te, thu ngaihthlakna (hearing) te, sawiselna leh judicial review thlengin invenna tur tha tawk tak siam a ni tih a sawi.
Court chuan SIR hi India danpui kalh a nih thu sawiselna awmte chu a hnawl a. Voter list-a hming lang tawhte chu khua leh tui niah ngaih nghal theih ni mah se, special revision neih chhung hian enfiah leh theih an ni tih a sawi bawk.
Dan siam thara tar lan danin, mi pakhat khua leh tui nihnaa rinhlelh a nih vanga ECI-in a hming a paih a nih chuan, chumi chungchanga thutlukna siam turin chawlhkar li chhungin Citizenship Act hnuaia thuneitu tling hnenah a thlen tur a ni. Thuneitu hian thutlukna a siam hmain a insawifiahna hun a siam hmasa ngei tur a ni a, khua leh tui a ni ngei tih finfiah a nih chuan a hming chu voter list-ah thun let leh ngei tur a ni ang.
He thubuai hi Association for Democratic Reforms leh hruaitu dang Yogendra Yadav, Mahua Moitra te leh pawl hrang hrangin Bihar-a SIR an kalpui dan an sawiselna atanga lo piang chhuak a ni.