Aizawl: MNF Senior Vice President Dr. R. Lalthangliana chuan Rajya Sabha MP thlanna lo awm tura MNF official candidate atan Zothansangi Hmar, College Veng, Aizawl chu Thawhtannia Mizo Hnam Runa chhung inkhawmah a puang.
Candidate hian Thawhtanni la la hian Assembly Commissioner Zothansanga Ralte hnenah nomination form a file nghal a, MLA pali-in an rawtna hming an ziah hnan a, party hruaitute leh MLA ten an tawiawm a ni.
Dr. R. Lalthangliana chuan an candidate chu thalai viak tha tak leh Zofate zinga chhuanawm tak a nih thu sawiin, “MNF-ah hian thalaite tan hmun zau tak a awm a, hmeichhia Rajya Sabha MP candidate-a ruat hmasa ber party kan ni hian kan party-ah hmeichhiaten hmun pawimawh tak an luah thei a ni tih a lantir,” tiin duhsakna sang ber a hlan.
Candidate Zothansangi Hmar pawhin thu sawiin, MNF-in ram tana hmachhawp a neih te chhunzawm tura candidate-a thlan a ni chu lawmawm a tih thu a sawi a. “Ukil ka nihna angin dan hi mirethei tanpui nan leh dikna humhim nan hman a nih theih nan theihtawp ka chhuah ang,” a ti.
Zothansangi Hmar chuan thlan tlin a nih chuan ramri leh hnam humhimna, hmeichhe dinhmun chawikanna, thalai eizawnna leh sports & music, chutiang bawk a North East Industry Policy thar din te a hmalak a tum thu a sawi.
Zothansangi Hmar hi B.A (Political Science) leh LLB a ni a. Kum 2015 atang khan Ukil hna thawk tanin, MNF term hmasa khan Asst. Public Prosecutor hna a lo thawk tawh a. Tunah hian Private Law Firm pakhatah Ukil hna a thawk mek a ni.
Ukil hna a thawh mai bakah hian, kum naupang te a nih atangin ram leh hnam issue hrang hrang chanchinbua au chhuahpui thintu, freelance writer a ni a. Kum 2015 khan Mizoram Information Commission-in RTI leh Mizote chungchang essay inziahsiak a buatsaihnaah lawmman pakhatna a lo la tawh a, Arvind Kejriwal-a lehkhabu ‘Swaraj’ (Mahnia ro-inrel) a lehlin chu kum 2016-a tihchhuah niin, lehkhabu lehlin tha thlan chhuah Top-5 zingah a lang nghe nghe.
Zothansangi Hmar hi an veng College Veng YMA-ah Executive Member lo ni tawh tawhin, tunah hian MNF Legal Board-ah Treasurer niin, Mizoram Hindi Board leh Mizo Youtuber Association-ah te Legal Adviser a ni mek bawk.
Politics lamah hian chhungkua atangin, a pu Thanghuta (L) kha Mizoram underground sorkara Senator lo ni thin a ni a, a pa Rualkhuma Hmar (L) pawh kha MNF Adviser leh MNF Legal Board Chairman lo chelh tawh thintu a ni.