Aizawl: MINECO-a hnathawkte nau awmna hmun ‘PALNA Anganwadi-cum-Creche chu Social Welfare & Women and Child Development Minister Lalrinpuii’n Thawhtanni khan a hawng.
Hawnna inkhawmah Minister Lalrinpuii chuan thu sawiin, Secretariat-a hnathawktu nu leh pa, a bik takin hmeichhe hnathawkten rilru ngaihngam taka hna leh chhungkaw enkawl kawp chung zela sorkar hna an thawh theih nana he hmun hi siam a nih thu a sawi a. Kum 6 hnuailam naupangte chu an taksa leh rilru nasa taka a than lai a nih avangin uluk taka enkawl an ngai tih sawiin, he creche kaltlang hian naupangte hriselna, ei leh in, leh an hmasawnna kawng hrang hrang chhinchiah zui zel a nih tur thu a sawi.
He hmun hian nu hnathawktute phurrit a chhawk ngei a rin thu sawiin, thawktute chu theihtawp chhuah turin a chah bawk.
He nau awmna hmun hi Ministry of Women & Child Development (MoWCD)-in Mission Shakti hnuaia hnathawktu mi 50 aia tam awmna hmuna creche facility neih ngei tur a tih anga duan a ni a. Anganwadi hnai ber nena thlunzawm a nih angin, naupangten nutrition (chaw tha), health check-up, leh zirtirna bulpui an dawng thei dawn a ni.