India chu khawvel pum huapa tuialhtheia harsatna awmte hmachhawn turin a inpeih a, ni 76-80 chhung hman daih tur khawl a nei tih Union Petroleum & Natural Gas Minister Hardeep Singh Puri-a’n a sawi.
CNN-News 18-in a kawmnaah Puri-a chuan a man pawh a tlakhniam a beisei thu a sawi a, chutih rualin ram tana energy-ah hlauhthawnawm a awm loh thu a sawi bawk.
“Harsatna karah hian ram chhung khawi hmunah mah a kang chat lo va, in la thawn chhuak zel zawk a ni,” a ti.
Tuialhthei man pawh ‘hetianga sang’ hi hun rei tak a nih a beisei loh thu a sawi bawk a, India hian Strait of Hormuz khar a nih pawhin ni 30-60 tal mamawh pe thei tur khawpa khawl a nei a, thlitfim reng a ni a, khawl a ngah tawk tih a sawi a ni.
“Hormuz hi ni 30 dang khar a nih chuan eng nge thleng ang? Ram chhung dinhmun kan hria a, dah khawl kan nei vek a… ka duh dan chu chu 60-60-60 a ni a, chu chu ni 60 chhung tuialhthei thlitfim loh, natural gas leh LPG daih ka nei tihna a ni,” tiin Puri-a chuan a sawi.
Puri-a chuan sorkar chuan Gulf pawn lam atanga chawk luh dan tur pawh a dap nasa thin tih a sawi a. Mozambique atanga gas lak tur chuan kham neih theihna turah a puih ngei a rin thu pawh a sawi.
Union minister hian UAE thuneitute nena an inbiakna te, ADNOC group chief executive Sultan Al Jaber-a te nena an inbiakna pawh a tar lang bawk.
Minister hian tun dinhmunah hlauhthawnna tur a awm loh tih a sawi rualin Strait of Hormuz chu khar chhunzawm zel emaw, buaina chhuak chu hmun dangah a darh emaw a niha a nghawng zel tur chu sawi lawk vek theih a nih loh thu a sawi a. “A chhe ber thleng thei a ni a, tun ang reng hi kan ni lo thei,” a ti a. Chuvang chuan hmun dang lakna pawh dap reng a ni tih a sawi.