Aizawl: BJP Mizoram hruaitu, Palak constituency MLA K. Hrahmo chuan Mizo hmeichhiate non-tribal te laka ven nan leh an dikna humhalh a nih theih nan Mizoramah Uniform Civil Code (UCC) hman ve a tul thu a sawi.
Thawhtanni khan BJP Mizoram State Office, Mipui Run, Upper Republic-ah kar thar inhlanna leh political session-ah K. Hrahmo chuan central sorkarin dan thar a siam thinte hi Mizoram mipuiten an hriatchian loh avang leh politics inbeihna atan hmanga an lo hlauhna thinte a âwm hle a; mahse, a hnuah an tan a lo tha leh thin tih a sawi a. UCC hi tribal-te huam lova siam a nih thu sawiin state dang UCC hmang mekte pawhin an state-a tribal-te an huamtir lo tih a sawi.
Mizorama UCC hman a tul chhan hrang hrang sawiin Hrahmo chuan, “Mizoramah hian non-tribal eng emaw zat an awm a, an rama nupui nei reng chungin Mizo hmeichhiate an nei leh thin a ni. An Mizo nupuite hmang tangkaiin sumdawnna an kalpui a, an sumdawnna a tlakchhiat hnuah an nupui fanaute an chhuahsan leh mai thin,” tiin hetiang lakah hian Mizo hmeichhiate ven an ngai a ni, a ti.
UCC hnuaiah miin nupui pakhat chauh an nei thei a, inthenna leh ro insemah pawh dan mumal tak a awm avangin Mizo hmeichhiate tan venhimna a tling dawn tih a sawi a. Congress party chuan politics-a hamthatna an duh avangin UCC hi Mizoram mipui lakah a hlauhawm zawngin an tlangaupui thin nia sawiin, tribal state-te hian UCC hi eng vangin nge an mamawh zawk tih hi ngun taka zirchian a tul hle a ni tiin a sawi bawk.