Aizawl: Mizoram sorkar hnuaia finance department chuan dik tawk lova family pension la mekten September 30 hma ngeia a kir tura hriattirna a lo siam tawh hmalakna chu chhunzawm zelin October 1, 2026 atang hian dik lo tak la mekte zawn chhuah hna thawk turin district tinah task force an thawk chhuak tan dawn.
Task force-ten endik hna an thawhna kawngah Central YMA-in branch zawng zawngte lo thawhpui tura ngenna a lo siam tawh angin an kalna hmun apiangah a tul ang zelin branch YMA leh pawl dangte pawh an thawhpui dawn a ni.
Hun tiam chhunga an Pension Payment Order (PPO) kir lehtute chu an kir ni thleng pension pek an ni ang.
Hun tiam chhunga PPO pe kir lo leh dan dik loa pension emaw, family pension emaw la, hmuh chhuah an nih chuan task force leader hmingin proforma duan sa angin insawi fiah tura hriattirna pek an ni ang a. Chumi hnuah a tul dan azirin police station hnai berah Bharatiya Nyaya Sanhita (BNS) leh IPC hmangin thubuai ziah luh a ni ang.
Hetih lai hian sorkar pisa thenkhatah confidential report box hun chhuah hmuh tur a awm a, “Dan lova family pension la, surrender duh lo kan hriatte report-na, an hming, veng leh contact no. ziaka thehluhna tur a ni. Report tuin mahni hming ziah a ngai lo,” tiin bawm an dawh a ni.