Zoram People’s Movement (ZPM) chuan kum 2026 atanga 2029 chhung atan an party Executive Office Bearer tur hruaitu thar a ruat thar a, president atan Chief Minister Lalduhoma ruat a ni.

Thawhtannia ZPM pisaa inkhawmah ZPM Val Upa Council Secretary, Prof. Thangchungnunga chuan an party hruaitu thar ruat an nih thu hi a puang a ni. Tuna hruaitute term a tawp tak avangin, party mipui duh dan angin ZPM Executive Committee chuan August ni 26, 2026 khan Val Upa Council hnenah hruaitu tur ruatna thu thuneihna a lo hlan tawh a. Hei hi zawmin September ni 15, 2026-a Val Upa Council thukhawm chuan kum thum chhung atan hruaitu tharte hi an thlang chhuak ta a ni.

Hruaitu thar ruat takte hi Lalduhoma, President (Chief Minister); Dr. Kenneth Chawngliana, Senior Vice President (Planning Board Vice Chairman); Lalmuanpuia Punte, Vice President (Adviser to Chief Minister & Hrangturzo MLA); leh T. Lalhlimpuia, Treasurer (Lunglei West MLA) te an ni.

CM leh party president nihna chelh kawp chu a hun leh hmun azira tha zawk tura thutlukna siam a ni – ZPM president

ZPM president atana ruat thar, chief minister ni bawk, Lalduhoma chuan party inlungrualna tichhe thei thil hrang hrang laka fimkhur a nih tur thu sawiin, chief minister leh party president nihna chelh kawp chu a hun leh hmunte zir zela a tha zawk tura thutlukna siam a nih thu a sawi.

Thawhtanni khan ZPM hian an party pisa-ah chhung inkhawm an nei a. President atana puan a nih hnuah Lalduhoma, chief minister chuan thu sawiin, Pathian kaihhruaina zarah an party-in kum 10 hmel a hmuh tak thu leh, sorkar hial tura thlenpuitu hruaitu kalta te chu ZPM a awm chhung chuan an hre reng tawh dawn tih a sawi.

Lalduhoma chuan hruaitu thar ruat chungchangah VUC kaltlanga tawngtai chhanna hmuh a nih thu sawiin, Mizorama party awm zingah Val Upa Council nei awm chhun an nih a, inthlan hma fe atanga chief minister tur ruat lawk diam thin an nih avangin ZPM-ah chuan house leader inchuhna leh buaina dang a awm ve ngai lo tih a sawi a. Tuna EOB ruat turah hian VUC chuan tumah an rawn lo tih a sawi a, party President pawh rawn a ni lo va, chief minister pawh rawn a ni lo va, an ruat apiang a pawm pui theih thu erawh VUC a hrilh tih a sawi. An constitution-ah VUC thutlukna chu thu tawp a ni ang tih a nih angin, appeal theih a ni lo va, lawm taka pawm tlan mai tur a nih thu a sawi.

Khawvel leh hun inher mil zelah ngaihdan leh kalphung thlak a tul thin thu sawiin, thuthlung hlui leh thuthlung thar a awm angin ngaihdan danglam chu thil thar a nih loh thu a sawi a. Tun hma chuan chief minister leh party president chelh kawp tha ti lo mah se, tun dinhmunah erawh party thuneitu sang kal khawm chuan chelh kawp chu tha zawka an hriat avanga kalpui thar a nih thu leh, tuna kalphung thar hi enchhin a nih hnuah a that loh chuan a tha zawk hmanga inthlak leh mai tur a nih thu a sawi bawk.

Party hruaitu chelh tur te chu ram leh party tana thawk tak tak tur an nih a tul thu leh, mahni hma sial, hotute tlawna intih theih ching leh, party chhungah committee thu tiput ru (leak out) thin, WhatsApp group-a thute rawlhruk chingte chu party-ah dinhmun sang pek an duh loh thu a sawi a. Thu ruk tichhuak chingte chu chhui chhuah an nih dawn thu sawiin, chutiang ti thinte chu primary member bak a aia chanvo sang an chelh tir dawn loh thu a sawi a, “Party inlungrual tak kan nih chhung chuan pawn lam miten min tichhe thei ngai lo vang,” a ti.