Mizote hi hnam huaisen, midangte harsatna hrethiam, pachhe zawkte dawmkanga midangte harsatna siam zawnga khawsa duh lo hnam kan ni.
Tun hnaiah erawh heng kan nihnate hi kan bosal telh telh niin a lang a, a huhoa buaina siam thin leh nunna hial chan phah ta an awm ta fo mai hi inenchian kan ngai hle.
Hetiang mite hi mi tam an ni lo a, tunlai thiamna leh finna hre ve ik ek, hre zik tluak si lo, khawvel thim lai chauh thlir peih a, a hmasawnna hmuthiam duh lo an ni chawk.
Heng mite vai leh vei hna hi ngawrh zawka kan thawh a ngai a, tangruala kan beih chuan kan hnehin, kan hnam hmel tibal thei lakah kan fihlim ngeiin a rinawm. Chumi tur chuan kan zavaia kan tanrual erawh a ngai a ni.
Sorkar pawhin heng a huhoa mi tihbuai ching, buaina hmuna a huhoa mi beih rawn chingte hi dim lo se la, an man a nih pawhin hremna na zawk pe se la, an tihsual leh tawh lohna tur leh midangte zirtirna tur pawhin na zawka hremna an pek a tul a ni.
Heng mite hian kan hnam hmel an timawi lo a nih chuan an tih mawi tawhna turin thuneitute hian chetlak thiam ve mai tawh se la, a huhoa huai ringawt hi kan hnam kalphung a ni lo tih hre thar turin an chunga thuneihna lek ngam pawh a tul tawh hle.
Mizo nun mawi tak hi bo mai lo se la, mitin fimkhurin, khawvel hmasawn ruala hma kan sawn ve theihna turin buaina thleng lo turin mitin i fimkhur zel tawh bawk ang u.