MNF thalaite chuan Home Minister K. Sapdanga chu Chief Minister Lalduhoma’n hnathawk thei lovin a kut a phuarsak em ni tih an zawt.
Eptu pawla thalaite hian ram hruaitute chu lo zawh leh hlimhlawp bawla huau huau ringawt buaipui lovin dan leh thupek kenkawh kawngah tan la tur leh ti tak takna nen Mizoram tan ke pena hnathawk turin an phut tih Ningania Aizawl Press Club-a thuthar lakhawmtute an kawmnaah an sawi.
Assembly house-ah chief minister berin Mizoram Police chungchang mawi lo taka a sawi chuan police-te phurna a tihniam nasa hleah an ngai tih sawiin, “Khatianga Mizoram rorelna sang bera thu a chhakchhuak duh ta mai kha a mak a, police-te hotulu ber, home minister chu mahni hna pawh tlin lo leh minister chak lo tak anga tlang hriata lantir a duh vang zawk a ni em tih hi kan zawhna a ni,” an ti.
MNYF hian kkum 2025 khan Mizoramah tualthahna vawi 11 a thleng a, kuminah pawh a thleng zing ta hle niin an sawi a. Tun hnaia Kolasib district, New Builum khaw mi, sipai chawlh hmanga haw, Zakaria Lalhriattluanga (29) thihnain India deng chhuaka Mizoram a mualpho hle laiin ram hruaitu lu berten thuchhuah an la nei lo leh home minister-a ngawi tlat an dem thu an sawi.
Mizorama tualthahna leh chhiatna a thlen laia mipui thlamuan tura home minister thu leh hla hriat tur a awm loh laiin chief minister chuan hmakhalh leh lar khalh tum ni awm hrimin a thu leh hla hmuh tur a tam hle thung niin an sawi a. “Home minister zahawm tak hian a department chanah hian thuneihna a la nei a nih ngai chuan Zoramin harsatna a tawh lai hian mipuite thlamuan turin thuchhuah awmze nei, mipuite thlamuanna thuchah nei rawh se,” an ti.
Home minister a ngawih reng chhan hi chief minister-in a department chan pahnih a chhuhsak tawh a, a tum thumna atana a department chan dang, home thlengin chhuhsak a tum leh ta em ni tih MNF thalaiten an zawt.
“ZPM party hruaitu thar ruata party dintute zinga nasa taka hma latu leh party tana thawh hlawk ber, K. Sapdanga chanvo nei miah loha dah nil-a a awm te, chief minister-in an party chhung inkhawma a um zui duh danah hian chief minister leh home minister inkarah hian thawhho hleih theih lohna leh khi thuk tak a awm tih a lang chiang hle a ni,” an ti bawk.