Aizawl: Chief Minister Lalduhoma chuan Ningani khan a office-ah Mizoram State Human Rights Commission chairperson leh member-te a kawm.
Chief minister hian lawmpuina leh an kal zelna tura duhsakna a hlan a. Hna an thawhna atana an mamawhte sawipuiin an mamawh zualpuite chu a rang lama ngaihtuah a nih tur thu a hrilh.
Chairperson Justice Marli Vankung chuan Mizoram State Human Rights Commission hmasa ber atana sorkarin a ruat avangin chief minister hnenah hian lawmthu a sawi a. “Phur taka thawh kan tum a, complaint pawh pathum kan dawng tawh,” a ti.
Commission thar a nih avangin thawktu leh hmanraw lamah mamawh eng eng emaw an nei a, lawmthu sawi pahin chung an mamawh zualpuite an rawn thlen tih a sawi bawk.
Mizoram State Human Rights Commission chairperson bakah member Vanlalenmawia, MJS (Rtd.) leh K. Lal Nghinglova, IAS (Rtd.) te hi July 29 khan Mizoram Larsap General (Dr) Vijay Kumar Singh, PVSM, AVSM, YSM (Retd) chuan rinawmna thu tiamtirin a lalut a ni.