Aizawl: ZPM Val Upa Council (VUC) bultumtute zinga mi pahnih – Bualhranga leh Rin Sanga, IAS (Rtd) te chuan an chairman hnenah Thawhtanni an bânna an theh lut.

Thudawn danin Bualhranga bânna lehkhaah hian chief minister sukthlek hmang chu a duh loh chin (ram tâna pawi tur) a pêl tih te, ministry chu sawi mawi leh sawi mam ringawt thiamin a ho khawm tih te, chief minister chu mipat hmeichhiat thuah sawi sep a awm tih te, ei ruknaah pawh sawi sep a kai tihte a tar lang.

Hengte leh chhan hrang hrang avangin bânna a theh lût tih a tar lang bawk.

VUC-ah hian Lalfak Zuala, IAS (Rtd) chu chairman a ni a. Bualhranga leh Rin Sanga te hi VUC bultumtute zinga mi, a tir atanga tel an ni.

VUC member bângin ZPM hruaitu tharte VUC kaltlang a nih lohzia tichiangah Congress thalaiten ngai

Congress thalai, MPYCC chuan VUC atanga Bualhranga leh Rin Sanga bânna thehluh chuan ZPM president thar puan nia Lalduhoma’n an party hruaitu tharte chu VUC kaltlanga Pathianin a pek a ni tih pawm turin an party mite a ngen kha VUC kaltlang a nih loh zia a tichiangah an ngai tih an sawi.

MPYCC chuan VUC member pahnih bân chhanah VUC chu sorkar khalh ngiltu tur, thurâwnte pe a, a \ul huna zilhtu tura din a nih laiin tunah chuan ZPM ministry-a sorkar hotu thenkhatten an duh angin an kawih her mai maizia te, VUC-in a awm chhan ang takin awmzia a nei tawh lo nia an hriat vang te, chief minister sukthlek hmang chu ram tâna pawi tur tih te, ministry chu sawi mawi leh sawi mam ringawt thiamin ZPM a ho khawm avang te, chief minister hmeichhiat mipatna leh ei rukah sawi kai nia tar lan a ni chu zahthlak an ti takzet tih an sawi.

“Mizoram, Kristian ram hruaitu hetianga mipat hmeichiatna leh ei ruk lama a fihlim lo hi ram hruaitu ni tlak lo, ram leh hnam mualphona a ni a. Insawifiah buai lova chief minister a nihna leh ZPM president a nihna bânsan nghal turin Chief Minister Pu Lalduhoma a phut a ni,” an ti.