World Day of the Deaf’ (Bengngawngte Ni) vawi 12-na chu National Programme for Prevention & Control of Deafness (NPPCD), National Health Mission (NHM) leh RIPANS Hospital tangkawp buatsaihin Thawhtanni khan RIPANS Hospital, Zemabawk-ah hman a ni a. NHM Mission Director Dr. R. Lalchhuanawma chuan khuallian niin a hmanpui.
Khuallian chuan he ni hian a tum ber chu bengngawngte harsatna hriatthiampui leh bengngawn tihkiansak tura mipui zirtirna zau zawk thehdarh a nih thu a sawi a. Khawvel pumah mihring tluklehdingawn 1.5 velin ri hriatna chak lo an nei a, heng zinga maktaduai 430 chu an beng a ngawng tih sawiin, enkawl uluk leh ri bengchheng laka fihlim a pawimawh thu a sawi.
Mizoramah NPPCD hmalakna tar langin, kumin April atanga July chhunga record-ah damlo 11,435 en tawh a nih bakah bengngawng mi 428 enkawlin, mi 128 zai an nih tawh thu leh bengdar 22 vuahsak tawhin, mi 777-te hi bengdar dawng turin refer an nih tawh thu a sawi.
Khualzahawm RIPANS Medical Superintendent Dr. H. Lalrinmawia leh Consultant Dr. Lalthanmawii Khalthang te pawhin thu an sawi.
He hunah hian ENT Specialist, Audiologist leh NGO aiawhte pawhin thupui hrang hrang hmangin zirtirna an pe a, tualchhung school hrang hrang atangin zirlai naupang thahnem tak an tel a ni.