Chief Minister Lalduhoma hovin Thawhtanni khan sericulture department review meeting neih a ni a. He hunah hian Mizoram chu silk thar chhuaktu state lian tak nihtir a tum thu a sawi.
CM Conference Hall-a thutkhawmah hian chief minister chuan ‘Viksit Mizoram 2047’ tihlawhtling turin kawng hrang hrangin hma lak mek a nih thu leh Mizoram chu silk thar chhuaktu state lian tak a nih theih nan project lian tham kalpui a nih tur thu a sawi a. Chak zawka hna an thawh theih nana department meuh pawhin an harsatnate sawi zauna hun atan he review meeting hi koh a nih thu sawiin, district officer-te pawh inthlahrung lova an mamawhte sawi chhuak turin a chah.
Thutkhawmah hian pangang khawituten an mamawh dah thatna refrigerator lei belhna tur proposal thehlut tura hrilh niin thawktu indaih lohna hnawh khah nan recruitment rules siam that leh post danga proposal-te thehluh rel a ni bawk.
Department hmalakna tlangpui tar lan a nih danin Mizoramah sericulture farmer 7,040 awm mekin kumin September thla thleng khan cocoon metric ton 53.8260 an thar chhuak tawh a, sorkar pawhin kg-ah Rs 300 atangin Rs 350-ah a rate a tipung a ni.
Aizawl, Lunglei leh Saitual district-ah central sector hnuaiah Eri, Muga leh Mulberry Value Chain Enhancement Project-te kalpui mek niin handholding hnuaia CM Special Package leh loan hmutute za zela 70 chuan cocoon an thar tan tawh a. Hemi hnuai atang hian Hrangngaihkimi, Tawipui North II chuan CM Award 2026 a dawng a, Lalchhandami, Tuipui D pawhin Central Silk Board Foundation Day-ah Best Achiever Award a dawng.
Sericulture Minister Lalthansanga chuan review meeting a neihpui avangin chief minister chungah lawmthu a sawi a, sericulture-a Mizoram theihna tar lang tharin thawktute leh lo neitute tan phurna thar a thlen thu a sawi a ni.